2026-cı ilin birinci yarısında qlobal birləşmə və satınalma əməliyyatlarının həcmi 2025-ci ilin eyni dövrü illə müqayisədə təxminən 30% artaraq 2,6 trilyon dollara çatıb.

Marja.az xəbər verir ki, Bloomberg-in topladığı məlumatlara görə, şirkətlər ilin birinci yarısında hər birinin dəyəri 10 milyard dollar və ya daha çox olan 38 saziş imzalayıblar. İmzalanmış sazişlərin sayı altı aylıq dövr üzrə indiyədək qeydə alınmış ən yüksək göstəricidir.

Ekspertlərin fikrincə, bu ilin sazişlər baxımından potensial rekord il olacağı proqnozlaşdırılır. İlin birinci yarısında bu gözlənti özünü doğruldub və prosesin 2026-cı ilin son aylarında da davam etməsi ehtimal olunur.

Tanınmış qida məhsullarından elektrik şəbəkələrinə qədər müxtəlif sahələrdə şirkətlərin baş icraçı direktorları, direktorlar şuraları və onları dəstəkləyən bankirlər geniş spektrli əməliyyatlar həyata keçiriblər. Bütün bunlar isə müharibə, iqtisadi narahatlıqlar və siyasi qeyri-müəyyənlik fonunda baş verib.

Morgan Stanley-in birləşmə və satınalmalar üzrə qlobal həmsədri Tom Miles bildirib: “İnsanlar bu volatilliyi qəbul ediblər və onun sona çatmasını gözləmək əvəzinə, məhz bu mühitdə investisiya qoymağa davam edirlər”.

Bloomberg-in topladığı məlumatlara əsasən, şirkətlər ilin birinci yarısında hər birinin dəyəri 10 milyard dollar və ya daha yüksək olan 38 saziş imzalayıblar. Bu, altı aylıq dövr üçün indiyədək qeydə alınmış ən yüksək göstəricidir. Əldə olunan nəticə ötən ilin ikinci yarısında müəyyənləşdirilmiş əvvəlki rekordu geridə qoyub.

NextEra Energy-nin Dominion Energy üçün açıqladığı 67 milyard dollarlıq təklif ABŞ-da nəhəng enerji şirkətinin formalaşmasına səbəb olacaq. AvalonBay Communities ilə Equity Residential arasında təklif olunan və ümumi bazar dəyəri 50 milyard dolları aşan birləşmə isə daşınmaz əmlak inkişaf etdiriciləri arasında oxşar təsir yaradacaq.

Bundan əlavə, Unilever qida bölməsini ədviyyat və sous istehsalçısı McCormick & Co.-ya təxminən 45 milyard dollara satır.

JPMorgan-ın qlobal birləşmə və satınalmalar üzrə rəhbəri Charles Bouckaert bildirib: “Daha iri, daha yüksək profilli və daha mürəkkəb əməliyyatlar bazarın çox böyük hissəsini təşkil edir. Bu, olduqca qeyri-adi vəziyyətdir”.