Yapon yeni cümə axşamı gec saatlarda ABŞ dolları qarşısında 161 səviyyəsini keçərək təxminən 40 ilin minimumuna yaxınlaşıb. Bu isə Tokionun milli valyutanı müdafiə etmək üçün yenidən bazara müdaxilə edə biləcəyi ilə bağlı gözləntiləri artırıb.

Marja xəbər verir ki, cümə axşamı Yaponiya fond bazarları bağlandıqdan sonra yen kəskin şəkildə ucuzlaşıb. Valyuta dollar qarşısında əvvəlcə 161 səviyyəsini keçib, daha sonra gün ərzində zəifləməni davam etdirərək 1 dollar üçün 161,80 yenədək geriləyib. Bu, 2024-cü ilin iyulundan bəri ən aşağı səviyyədir.

Yenin dollar qarşısında 161,96 səviyyəsindən də zəifləməsi onun 1986-cı ildən bəri ən aşağı həddə enməsi demək olacaq.

Yenin ucuzlaşması Yaponiya maliyyə rəsmilərinin yeni xəbərdarlıqlarına səbəb olub. Bildirilir ki, maliyyə naziri Satsuki Katayama bu yaxınlarda keçirilən G7 görüşündə Yaponiyanın valyuta bazarlarında spekulyativ hərəkətlərə qarşı “qəti addımlar atmağa hazır olduğunu” deyib.

Valyuta, Maliyyə Nazirliyinin may ayında həyata keçirdiyi 70 milyard dollardan çox müdaxiləyə və Yaponiya Mərkəzi Bankının son faiz artımına baxmayaraq təzyiq altında qalmaqda davam edir. Faiz artımından sonra ölkədə borclanma xərcləri 1995-ci ildən bəri ən yüksək səviyyəyə yüksəlib.

Yaponiya Mərkəzi Bankının sədr müavini Ryozo Himino parlamentdə bildirib ki, mərkəzi bank valyuta məzənnəsindəki hərəkətləri diqqətlə izləyir. Onun sözlərinə görə, məzənnə dəyişiklikləri ölkə iqtisadiyyatına və inflyasiyaya təsir göstərir.

CNBC-yə danışan ekspertlər bildiriblər ki, yenin zəifləməsinin qarşısını almaq üçün həyata keçirilən müdaxilələr əsasən səmərəsiz qalıb. Buna səbəb valyutaya təsir edən amillərin struktur xarakter daşımasıdır.

Bu amillərə dolları dəstəkləməkdə davam edən yüksək ABŞ xəzinədarlıq istiqrazları gəlirliliyi, eləcə də Baş nazir Sanae Takaichi administrasiyasının iqtisadi artıma yönəlmiş siyasəti daxildir. Hökumət nisbətən yumşaq monetar şərtlərə üstünlük verdiyinə dair siqnallar verib.

Zəif yen Yaponiyanın ixracını və iqtisadi artımını dəstəkləsə də, idxal inflyasiyası və ev təsərrüfatlarının alıcılıq qabiliyyətinin azalması ilə bağlı narahatlıqları artırır.

İş elanları AzVak.az-da