ABŞ Federal Ehtiyat Sistemi (FED) Federal Açıq Bazar Komitəsinin (FOMC) 2 günlük iclası bu gün başa çatacaq. İyun ayı üzrə faiz qərarını bu gün Bakı vaxtı ilə saat 22:00-da açıqlanacaq.

Marja xəbər verir ki, Bloomberg-in sorğusunda iştirak edən iqtisadçıların median gözləntisinə görə, faiz dərəcəsi intervalının 3,50%–3,75% səviyyəsində saxlanılacağı proqnozlaşdırılır. FED-in yeni sədri Kevin Warsh (Kevin Uorş) bu vəzifədə iştirak etdiyi ilk iclasdan sonra Bakı vaxtı ilə saat 22:30-da mətbuat konfransı keçirəcək.

Bu iclas ABŞ Prezidenti Donald Trampın uzun müddətdir davam edən faiz endirimi təzyiqləri, digər tərəfdən isə inflyasiya təzyiqlərinin ev təsərrüfatlarının alıcılıq qabiliyyətini zəiflətməsi fonunda Warsh üçün erkən sınaq xarakteri daşıyacaq. İclas ərəfəsində bəzi FED rəsmiləri zərurət yaranarsa faiz artımını tələb edə biləcək ssenariləri gündəmə gətirərək, “növbəti addımın böyük ehtimalla faiz endirimi olacağı” təsəvvürü yaradan ifadələrin qərar mətnindən çıxarılmasını istəyirlər. Bu ifadə dəyişikliyi bu həftəki iclasda reallığa çevrilə və Warshı həssas balans qurmaq məcburiyyətində qoya bilər. Fed sədrliyinə namizəd göstərilməzdən əvvəl Warsh Trampın faiz endirimi çağırışları ilə eyni mövqedə görünürdü.

İndi isə yeni sədr prezidentin istədiyini həyata keçirməyi çətinləşdirən inflyasiya mühiti və həmkarlarının mövqeləri ilə hesablaşmalı olacaq. Fyuçers bazarlarında qiymətləndirməyə görə, investorlar Fed-in dekabr ayına qədər faiz artırması ehtimalını 80%-dən yuxarı qiymətləndirirlər. İnvestorlar xüsusilə Warsh-ın Fed-in inflyasiyanı 2%-lik hədəfə qaytarmaq əzminə nə dərəcədə güclü dəstək verəcəyini diqqətlə izləyəcəklər. Bundan başqa, ABŞ və İran arasında mümkün atəşkəsin inflyasiya və ABŞ iqtisadiyyatına təsirləri ilə bağlı Warsh-ın fikirləri də diqqət mərkəzində olacaq.

FED eyni zamanda yeni iqtisadi proqnozlarını və faiz gözləntilərini əks etdirən “nöqtə qrafiki”ni (dot plot) açıqlayacaq. Bloomberg-ə görə, iqtisadçılar Fed rəsmilərinin daha yüksək inflyasiya proqnozu təqdim edəcəyini və faiz endirimi gözləntilərini 2027-ci ilə təxirə salacağını gözləyirlər. Bununla yanaşı, Citi əmək bazarının qarşıdakı aylarda zəifləyəcəyi təqdirdə FED-in sentyabr ayından başlayaraq bu il üç dəfə faiz endirəcəyini proqnozlaşdırır. Qurumun ABŞ üzrə baş iqtisadçısı Andrew Hollenhorst-un fikrincə, Hörmüz Boğazının yenidən açılması və atəşkəs gözləntisi fonunda enerji qiymətlərinin enməsi Warsh-a daha yumşaq monetar siyasət aparmaq üçün əlavə manevr imkanı yarada bilər.

İş elanları AzVak.az-da