Qızıl ABŞ-İran sülh razılaşmasına dair nikbinliyin ABŞ-da faiz artırımı gözləntilərini azaltması fonunda çərşənbə günü ardıcıl beşinci sessiyada da bahalaşıb.

Marja xəbər verir ki, investorlar bir tərəfdən razılaşmanın detallarını, digər tərəfdən isə ABŞ Federal Ehtiyat Sisteminin (FED) pul siyasəti iclasını gözləyirlər. FED bu gün Bakı vaxtı ilə saat 22:00-da faiz qərarını açıqlayacaq. FED-in faizini 3,50%- 3,75% aralığında sabit saxlayacağı gözlənilir. 

Qızıl 0,3% də bahalaşaraq bir unsiyasının qiyməti 4341,12 dollara yüksəlib. Beləliklə, qızıl bazar ertəsi qeydə alınan bir həftənin ən yüksək səviyyəsinə yaxın qiymətlərdə ticarət olunub. 

Yaxın Şərqdəki münaqişələrə son qoymağı hədəfləyən müvəqqəti ABŞ-İran razılaşmasına dair detallar aydınlaşmağa başlayır. ABŞ Prezidenti Donald Tramp razılaşmanın Tehranın nüvə silahı əldə etməsinin qarşısını alacağını bildirib. ABŞ rəsmilərindən biri isə razılaşma imzalandıqdan sonra İrana neft satmağa icazə veriləcəyini qeyd edib.

İran neftinin yaxın vaxtlarda qlobal bazarlara qayıda biləcəyi xəbərləri fonunda neft qiymətləri son üç ayın ən aşağı səviyyələri yaxınlığında qalıb. Bu vəziyyət inflyasiya ilə bağlı narahatlıqları da yumşaldıb.

Neft qiymətlərindəki geriləmə faizlər üzərində yuxarı istiqamətli təzyiqin bir hissəsini azaldıb və faizlərin artırılacağı gözləntilərini zəiflədib. Lakin bütün diqqətlər FED-in pul siyasəti qərarına yönəldiyi üçün qızıldakı yüksəliş tempi bir qədər zəifldir.

İnvestorlar bu gün açıqlanacaq FED-in faiz qərarına və rəsmilərin bəyanatlarına fokuslanıblar. Faiz dərəcələrinin böyük ehtimalla dəyişməz saxlanılacağı gözlənilir.

Bugünkü FED iclası Kevin Uorşun sədrliyi ilə keçirilən ilk iclasıdır. İnvestorlar hələ də onun sərt monetar siyasət keçmişini, artan inflyasiyanı və Ağ Evin daha yumşaq siyasət tələblərini necə balanslaşdıracağına əmin deyillər.

CME FedWatch məlumatlarına görə, investorlar artıq dekabr ayında ABŞ-da faiz artırımı ehtimalını 59% səviyyəsində qiymətləndirirlər. Bu göstərici ABŞ-İran sülh razılaşması açıqlanmadan əvvəl, ötən həftə təxminən 70% idi.

Faiz dərəcələrinin yüksək olduğu dövrlərdə qızıl faiz gəliri gətirmədiyi üçün investorlar üçün cəlbediciliyini müəyyən qədər itirə bilir.

İş elanları AzVak.az-da