İsveçrədə əhalinin sayının 10 milyon nəfərlə məhdudlaşdırılmasını nəzərdə tutan referendum rədd edilib.

Marja xəbər verir ki, 14 iyun 2026-cı ildə keçirilən ümumxalq səsverməsində seçicilərin təxminən 55%-i təşəbbüsün əleyhinə, 45%-i isə lehinə səs verib. İlkin qiymətləndirməyə görə, seçici fəallığı təxminən 58% təşkil edib ki, bu da İsveçrə referendumları üçün son illərin orta göstəricisindən yüksəkdir.

“10 milyonluq İsveçrəyə yox! Dayanıqlılıq təşəbbüsü” adlanan referendum sağçı İsveçrə Xalq Partiyasının təşəbbüsü ilə irəli sürülmüşdü. Təşəbbüs ölkə əhalisinin 2050-ci ilə qədər 10 milyon nəfəri keçməməsini nəzərdə tuturdu. İsveçrə hökumətinin izahına görə, əgər daimi əhali 9,5 milyon nəfəri keçsəydi, hökumət və parlament miqrasiya, sığınacaq və ailə birləşməsi sahəsində məhdudlaşdırıcı tədbirlər görməli olacaqdı. Əhali 10 milyon həddini keçərdisə, İsveçrə Avropa İttifaqı ilə insanların sərbəst hərəkəti haqqında sazişi dayandırmalı ola bilərdi.

Referendumun rədd edilməsi İsveçrənin Avropa İttifaqı ilə münasibətləri və əmək bazarı baxımından mühüm qərar kimi qiymətləndirilir. Reuters yazır ki, təşəbbüs qəbul edilsəydi, bu, İsveçrə ilə Aİ arasında işçi qüvvəsinin sərbəst hərəkəti mexanizmini təhlükə altına sala bilərdi. Bu səbəbdən səsvermə bəzi müşahidəçilər tərəfindən “İsveçrə Brexiti” kimi xarakterizə olunurdu.

Hazırda İsveçrənin əhalisi təxminən 9,1 milyon nəfərdir. Rəsmi məlumatlara əsasən, 2002-ci ildə insanların sərbəst hərəkəti rejiminin tətbiqindən sonra ölkə əhalisi təxminən 1,7 milyon nəfər artıb. Bu artım əsasən miqrasiya ilə izah olunur. İsveçrə hökuməti bildirir ki, güclü iqtisadiyyat dövrlərində şirkətlər, xəstəxanalar və qayğı müəssisələri ehtiyac duyduqları ixtisaslı işçiləri çox vaxt Aİ ölkələrindən cəlb edirlər.

Təşəbbüsün tərəfdarları əhali artımının mənzil bazarına, nəqliyyata, sosial xidmətlərə və infrastruktur sisteminə təzyiq yaratdığını bildirirdilər. Əleyhdarlar isə belə bir limitin İsveçrə iqtisadiyyatına zərbə vuracağını, işçi qüvvəsi çatışmazlığını dərinləşdirəcəyini və Aİ ilə münasibətlərdə ciddi böhran yarada biləcəyini vurğulayırdılar.

Associated Press-in məlumatına görə, təşəbbüs qəbul olunsaydı, hökumət əhali artımını cilovlamaq üçün sığınacaq, ailə birləşməsi və yaşayış icazələri üzrə məhdudlaşdırıcı addımlar atmalı olacaqdı. Agentlik həmçinin qeyd edir ki, İsveçrə Aİ üzvü olmasa da, ölkənin Avropa ilə iqtisadi, mədəni və sərhədyanı əlaqələri dərin inteqrasiya xarakteri daşıyır.

İş elanları AzVak.az-da