ABŞ Prezidenti Donald Tramp ABŞ-da məşğulluq göstəricilərinin gözləntiləri üstələməsindən sonra FED (ABŞ Mərkəzi Bankı) rəsmilərinin faiz dərəcələrini artırmasının yanlış olacağını bildirib. Tramp Kevin Warsh-ın (FED-in yeni sədri) ilk Fed iclasına sədrlik etməzdən əvvəl ona təsir göstərmək istəmədiyini də deyib.

Marja xəbər verir ki, Tramp NBC-nin “Meet the Press” proqramına verdiyi müsahibədə “Bu gün yaxşı hesabatlar açıqlananda bazar düşdü, çünki faiz dərəcələrinin artırılacağı düşünülür. Faiz dərəcələrini artırmaq üçün heç bir səbəb yoxdur”, - deyib.

Cümə günü açıqlanan ABŞ məşğulluq hesabatında may ayındakı məşğulluq artımı bütün proqnozları üstələyib. Bu vəziyyət Xəzinədarlıq istiqrazlarında satış dalğasına səbəb olub, investorların isə ilin sonunadək Fed-in baza faiz dərəcəsində 0,25 bəndlik artım gözləməsinə gətirib çıxarıb.

Trampın açıqlaması 16-17 iyunda ilk Federal Açıq Bazar Komitəsi (FOMC) iclasına sədrlik etməyə hazırlaşan Warsh-ın üzərində təzyiq yaradan iqtisadi və siyasi amillərə yenisini əlavə edir. Tramp baza faiz dərəcəsini artırmağın “yanlış addım” olacağını bildirib. Tramp açıqlamasında “Əslində faiz dərəcələrini aşağı salmalıyıq”, - deyib.

Tramp müsahibəsində “Kevin-ə böyük hörmətim var, lakin mənim fikrimcə, bir ölkə yaxşı gedirsə, faiz dərəcələrini dərhal artırmaqla cəzalandırılmamalıdır”, - ifadələrini işlədib.

Tramp “Bilirsiniz, borclarımız var, başqa problemlərimiz var. Həll etməli olduğumuz işlər var. Hərbiyəyə daha çox investisiya yatırmaq istəyirəm”, - deyib.

ABŞ Əmək Statistikası Bürosunun məlumatlarına görə, əvvəlki iki ayın göstəricilərinin yuxarı istiqamətdə yenidən nəzərdən keçirilməsindən sonra ötən ay kənd təsərrüfatı istisna olmaqla məşğulluğun 172 min nəfər artması FED-in faiz artıracağı gözləntilərini gücləndirib. ABŞ-da işsizlik səviyyəsi isə 4,3 faizdə sabit qalıb.