Beynəlxalq Maliyyə İnstitutunun (IIF) yayımladığı “Qlobal Borc Monitoru” hesabatına görə, qlobal borcun həcmi bu ilin birinci rübündə 4,4 trilyon dollardan çox artaraq 353 trilyon dollarla rekord səviyyəyə çatıb.

Marja xəbər verir ki, ardıcıl beşinci rübdə artım qeydə alınan qlobal borcun həcmi ötən ilin eyni dövründə 327,6 trilyon dollar səviyyəsində idi. Artımın böyük hissəsinin Çin və ABŞ-dakı dövlət borclanmalarından qaynaqlandığı bildirilib.

2023-cü ilin əvvəlindən etibarən əsasən üfüqi seyir edən qlobal borcun ümumi daxili məhsula (ÜDM) nisbəti isə birinci rübdə 305 faiz olaraq hesablanıb.

Borc göstəricilərinin inkişaf etmiş iqtisadiyyatlarda azalma meylini davam etdirdiyi, inkişaf etməkdə olan bazarlarda isə artdığı qeyd olunub. Bu dövrdə ən nəzərəçarpan yüksəlişlər Norveç, Küveyt, Çin, Bəhreyn və Səudiyyə Ərəbistanında müşahidə edilib.

İnkişaf etmiş iqtisadiyyatların borcu 250 trilyon dollara yaxındır

Hesabata görə, inkişaf etmiş iqtisadiyyatların ümumi borcu ilin birinci rübündə 246 trilyon dollar olduğu halda, inkişaf etməkdə olan ölkələrin ümumi borcu 106,7 trilyon dollara yüksəlib.

Qlobal borcun bölgüsündə ev təsərrüfatlarının borcları 65,1 trilyon dollara, maliyyə olmayan şirkətlərin borcları 101,8 trilyon dollara, dövlət borcları 108,5 trilyon dollara və maliyyə sektorunun borcları 77,3 trilyon dollara çatıb.

Ümumi ÜDM-ə nisbət baxımından qiymətləndirildikdə, ev təsərrüfatlarının borclarının nisbəti ötən ilin eyni dövründəki 56,7 faizdən 56,2 faizə, maliyyə sektorunun borclarının nisbəti isə 67,5 faizdən 65,9 faizə enib.

Eyni dövrdə qeyri-maliyyə şirkətlərinin borclarının ÜDM-ə nisbəti 88,7 faizdən 88,8 faizə, dövlət borclarının nisbəti isə 92,1 faizdən 94,8 faizə yüksəlib.

“Müharibənin davam etməsi borclanma xərclərinə təsir edəcək”

Hesabatda yaşlanan əhali, artan müdafiə xərcləri, enerji təhlükəsizliyi ehtiyacı, kibertəhlükəsizlik investisiyaları və süni intellektə yönəlmiş kapital xərcləri kimi struktur təzyiqlərin orta və uzunmüddətli dövrdə hökumət və şirkət borclarını artırmasının gözlənildiyi bildirilib.

Yaxın Şərqdəki münaqişənin sözügedən təzyiqləri daha da gücləndirə biləcəyinə diqqət çəkilən hesabatda, qısamüddətli dövrdə borc dinamikalarının bölgədəki proseslərdən və maliyyə-pul siyasəti qurumlarının atacağı addımlardan asılı olacağı vurğulanıb.

Hesabatda, “Yüksək enerji və ərzaq qiymətlərindən qaynaqlanan artan inflyasiya təzyiqləri, xüsusilə enerji idxalçısı olan ölkələr başda olmaqla bir çox dövləti iqtisadi təsiri azaltmaq üçün maliyyə dəstəyi verməyə məcbur edəcək və bu da daha geniş büdcə kəsirləri, əlavə borclanma və xüsusilə maliyyə ehtiyatları məhdud olan inkişaf etməkdə olan bazarlarda daha yüksək borc səviyyələrinə səbəb olacaq” qiymətləndirməsinə yer verilib.

Yüksək inflyasiyanın qısamüddətli dövrdə borc göstəricilərini aşağı sala bildiyinə işarə edilən hesabatda, inflyasiyanın qalıcı xarakter alacağı təqdirdə bu təsirin davamlı olmayacağı bildirilib.

Hesabatda, “Yaxın Şərqdəki münaqişə davam edərsə, mərkəzi banklar inflyasiyanı nəzarətdə saxlamaq üçün aqressiv addımlar atmasa belə, uzunmüddətli qiymət təzyiqləri borclanma xərclərinə təsir göstərəcək” ifadələrinə yer verilib.

İş elanları AzVak.az-da