MÜSİAD Azərbaycan Ticarət və Sektor Şuraları Komissiyasının təşkilatçılığı ilə VİDAL Özəl Sənaye Məhəlləsində üzvlər arasında 5-ci “Bir və Bərabər” adlı növbəti netvörkinq görüşü keçirilib. Tədbirin əsas məqsədi sahibkarlar arasında işgüzar əlaqələrin genişləndirilməsi, yeni əməkdaşlıq imkanlarının yaradılması, qarşılıqlı təcrübə mübadiləsinin təşviqi və ölkənin sənaye-investisiya potensialının tanıdılması olub.

Tədbirin açılış mərasimində çıxış edən MÜSİAD Azərbaycan İdarə Heyətinin sədri Fuat Kayhan təşkilatın son dövrdə həyata keçirdiyi fəaliyyətlər, üzvlər arasında əməkdaşlığın gücləndirilməsi istiqamətində görülən işlər və qarşıya qoyulan strateji hədəflər barədə ətraflı məlumat verib. O bildirib ki, MÜSİAD Azərbaycan sahibkarların hüquq və mənafelərinin qorunmasına, biznes münasibətlərinin inkişafına və iqtisadi əməkdaşlığın genişləndirilməsinə xidmət edən nüfuzlu platformadır.

VİDAL Özəl Sənaye Məhəlləsinin təsisçisi “Industrial Management and Development” MMC şirkətidir. Tədbirdə çıxış edən “Industrial Management and Development” MMC şirkətinin direktor müavini Cavid Qurbanlı qeyd edib ki, VİDAL Özəl Sənaye Məhəlləsi Azərbaycanda sənaye istehsalının inkişafına, innovativ sahibkarlığın təşviqinə və kiçik və orta biznes subyektlərinin dəstəklənməsinə yönəlmiş müasir sənaye platformasıdır. O vurğulayıb ki, layihə yerli və xarici investorlar üçün əlverişli biznes mühiti formalaşdırmaqla ölkənin qeyri-neft sektorunun inkişafına mühüm töhfə verir.

Bildirilib ki, VİDAL Özəl Sənaye Məhəlləsi Bakı–Quba şossesi istiqamətində, Xırdalan şəhərində yerləşən 2.2 hektar əsas ərazidə fəaliyyət göstərən müasir sənaye kompleksidir. Eyni ünvanda layihənin əlavə 5 hektar inkişaf ərazisi də mövcuddur. Həmin ərazidə gələcək mərhələdə istehsalçı şirkətlərin texniki tələblərinə, sahə ehtiyaclarına və fəaliyyət istiqamətlərinə uyğun yeni istehsalat sahələrinin inşa edilərək rezidentlərin istifadəsinə verilməsi nəzərdə tutulur.

Qeyd olunub ki, layihə çərçivəsində fəaliyyət göstərən 11 mərtəbəli kompleks istehsalat, inzibati idarəetmə, elmi-texniki araşdırma və startap fəaliyyəti üçün nəzərdə tutulmuş müasir infrastruktura malikdir. Burada müxtəlif ölçülü istehsalat sahələri, ofislər, inkubasiya mərkəzi, konfrans zalı, toplantı otaqları, yeməkxana, parklanma sahələri, fiber-optik internet, alternativ enerji təminatı, ehtiyat generator sistemi, mərkəzləşdirilmiş kommunikasiya xətləri, 24/7 təhlükəsizlik və video nəzarət sistemi yaradılıb.

Tədbir iştirakçılarına dövlət tərəfindən sənaye məhəlləsinin rezidentlərinə təqdim olunan güzəştlər barədə də ətraflı məlumat verilib. Bildirilib ki, İnvestisiya Təşviqi Sənədi əsasında rezidentlər aşağıdakı imtiyazlardan yararlanırlar:

- Mənfəət və gəlir vergisi üzrə 7 il müddətində 50 faiz güzəşt

- Əmlak vergisi üzrə 7 il müddətində 100 faiz azadolma

- Torpaq vergisi üzrə 7 il müddətində 100 faiz azadolma

- İstehsal fəaliyyəti məqsədilə idxal olunan avadanlıqlar üzrə ƏDV-dən 7 il müddətində 100 faiz azadolma

- İstehsal fəaliyyəti məqsədilə idxal olunan avadanlıqlar üzrə gömrük rüsumundan 7 il müddətində 100 faiz azadolma

VİDAL Özəl Sənaye Məhəlləsinin direktoru Teyyub Cabbarov çıxışında bildirib ki, sənaye məhəlləsi yalnız istehsal platforması deyil, eyni zamanda texnoloji inkişafı, innovasiyanı və yeni sahibkarlıq təşəbbüslərini dəstəkləyən müasir biznes ekosistemidir. O qeyd edib ki, burada fəaliyyət göstərən inkubasiya mərkəzi gənc sahibkarların və startap komandalarının inkişafına xüsusi dəstək göstərir.

MÜSİAD Azərbaycan Ticarət və Sektor Şuraları Komissiyasının sədri Samir Babaoğlu isə çıxışında belə görüşlərin sahibkarlar arasında qarşılıqlı etimadın gücləndirilməsi, yeni tərəfdaşlıqların qurulması və birgə layihələrin formalaşması baxımından xüsusi əhəmiyyət daşıdığını vurğulayıb.

Tədbirin sonunda iştirakçılar arasında netvörkinq sessiyası təşkil olunub, müxtəlif sahələri təmsil edən iş adamları arasında yeni əməkdaşlıq imkanları və investisiya perspektivləri müzakirə edilib.

Telefon: +994 55 755 95 77

E-poçt: info@vidal-industrial.az