"Rabitəbank" ASC 2026-cı ilin ilk rübünü (yanvar-mart) 5 milyon 96 min manat xalis mənfəət ilə başa vurub. Bank 2025-ci ilin ilk rübünü 4 milyon 657 min manat xalis mənfəət ilə bağlamışdı. Beləliklə, "Rabitəbank"ın xalis mənfəəti 2026-cı ilin 1-ci rübündə ötən ili eyni dövrü ilə müqayisədə 439 min manat və ya 9,4% artıb. Bankın xalis mənfəətinin artması mümkün zərərlər üçün yaradılan məqsədli ehtiyatlara ayrılan məbləğin 2026-cı ilin ilk rübüdə ötən ilin eyni rübü ilə müqayisədə 456 min manat azalması ilə əlaqədar olub. Bankın cari dövrdəki fəaliyyətinin nəticəsini daha doğru əks etdirən əməliyyat mənfəəti azalıb. 

Marja.az-ın Bankın maliyyə göstəricilərinə istinadən məlumatına görə, 2026-cı ilin ilk rübündə "Rabitəbank"ın cəmi əməliyyat gəlirləri (faiz və qeyri-faiz gəlirləri) 49 milyon 393 min manat, cəmi əməliyyat xərcləri (faiz və qeyri-faiz xərcləri) 42 milyon 998 min manat, əməliyyat mənfəəti 6 milyon 395 min manat təşkil edib. Bank əməliyyat mənfəətindən 1 milyon 300 min manat mümkün zərərlər üçün yaradılan məqsədli ehtiyatlara ayırıb.

Müqayisə üçün qeyd edək ki, 2025-ci ilin ilk rübündə "Rabitəbank"ın cəmi əməliyyat gəlirləri 40 milyon 642 min manat, cəmi əməliyyat xərcləri 34 milyon 229 min manat təşkil etmişdi. Bank 6 milyon 413 min manat əməliyyat mənfəətindən 1 milyon 756 min manat mümkün zərərlər üçün yaradılan məqsədli ehtiyatlara ayırmışdı.

2026-cı ilin ilk rübündə ötən ilin eyni dövrü ilə müqayisədə "Rabitəbank"ın cəmi əməliyyat gəlirləri 8 milyon 751 min manat, cəmi əməliyyat xərcləri isə 8 milyon 769 min manat artıb. Qısası, xərclərdəki artım gəlirlərdəki artımı tamamilə silib və əməliyyat mənfəətinin cüzi azalmasına səbəb olub. 

BANK KİÇİLİB

"Rabitəbank"ın cəmi aktivləri 2025-ci ilin sonu ilə müqayisədə 7 milyon 30 min manat və ya 0,5% azalaraq 1 milyard 395 milyon 269 min manata düşüb. Bankın kredit portfeli isə (müştərilərə verilmiş kreditlər) 2 milyon 986 min manat və ya 0,3% artaraq 944 milyon 275 min manata çatıb. 

"Rabitəbank"da depozitlər isə 42 milyon 7 min manat və ya 4,8% azalaraq 836 milyon 293 min manata düşüb. İlk rübdə həm fiziki, həm də hüquqi şəxslərin depoitləri azalıb. 

MƏCMU KAPİTALI ARTIB

31 Mart 2026-cı il tarixində "Rabitəbank" 130 milyon 553 min manat məcmu kapitala malik olub. Bank 2025-ci ilin sonunda 125 milyon 444 min manat məcmu kapitala malik idi. 

İş elanları AzVak.az-da