"Premium Bank" ASC 2026-cı ilin ilk rübünü (yanvar-mart) 3 milyon 676 min manat xalis mənfəət ilə başa vurub. Bank 2025-ci ilin ilk rübünü 1 milyon 582 min manat xalis mənfəət ilə bağlamışdı. Beləliklə, "Premium Bank"ın xalis mənfəəti 2026-cı ilin 1-ci rübündə ötən ili eyni dövrü ilə müqayisədə 2 milyon 94 min manat və ya 132% (2,3 dəfə) artıb. Bankın cari dövrdəki fəaliyyətinin nəticəsini daha doğru əks etdirən əməliyyat mənfəəti artıb. 

GƏLİRLƏRİ ARTIB

Marja.az-ın Bankın maliyyə göstəricilərinə istinadən məlumatına görə, 2026-cı ilin ilk rübündə "Premium Bank"ın cəmi əməliyyat gəlirləri (faiz və qeyri-faiz gəlirləri) 14 milyon 476 min manat, cəmi əməliyyat xərcləri (faiz və qeyri-faiz xərcləri) 10 milyon 65 min manat, əməliyyat mənfəəti 4 milyon 411 min manat təşkil edib. Bank əməliyyat mənfəətindən 734 min manat mümkün zərərlər üçün yaradılan məqsədli ehtiyatlara ayırıb.

Müqayisə üçün qeyd edək ki, 2025-ci ilin ilk rübündə "Premium Bank"ın cəmi əməliyyat gəlirləri 11 milyon 846 min manat, cəmi əməliyyat xərcləri 8 milyon 964 min manat təşkil etmişdi. Bank 2 milyon 882 min manat əməliyyat mənfəətindən 1 milyon 301 min manat mümkün zərərlər üçün yaradılan məqsədli ehtiyatlara ayırmışdı.

2026-cı ilin ilk rübündə ötən ilin eyni dövrü ilə müqayisədə "Premium Bank"ın cəmi əməliyyat gəlirləri 2 milyon 630 min manat, cəmi əməliyyat xərcləri isə 1 milyon 101 min manat artıb. Bankın gəlirlərindəki artım, xərclərindəki artımı üstələyib və əməliyyat mənfəətinin 1 milyon 529 min manat artmasını təmin edib. Eyni zamanda mümkün zərərlər üçün yaradılan məqsədli ehtiyatlara ayrılan vəsaitin kəskin azalması mənfəətin artmasına töhfə verib. 

KREDİT PORTFELİNİN HƏCMİ 500 MİLYON MANATI AŞIB

"Premium Bank"ın cəmi aktivləri 2026-cı ilin birinci rübündə 2025-ci ilin sonu ilə müqayisədə 11 milyon 184 min manat və ya 1,7% azalaraq 31 dekabr 2026-cı il tarixində 666 milyon 485 min manat təşkil edib.

Bankın kredit portfeli isə (müştərilərə verilmiş kreditlər) 22 milyon 376 min manat və ya 4,7% artaraq 500 milyon 996 min manata çatıb. 

2026-cı ilin birinci rübündə 2025-ci ilin sonu ilə müqayisədə "Premium Bank"da depozitlər isə 20 milyon 70 min manat və ya 5,1% azalaraq 374 milyon 103 min manata düşüb. İlk rübdə fiziki şəxslərin depozitləri artıb, hüquqi şəxslərin depoitləri isə azalıb. 

MƏCMU KAPİTALI ARTIB

31 Mart 2026-cı il tarixində "Premium Bank" 196 milyon 661 min manat məcmu kapitala malik olub. Bank 2025-ci ilin sonunda 192 milyon 466 min manat məcmu kapitala malik idi. 

İş elanları AzVak.az-da