"Bank of Baku" ASC 2026-cı ilin ilk rübü üzrə maliyyə nəticələrini açıqlayıb. Hesabat bankın gəlirliliyində, aktivlərində və kredit portfelində artımın davam etdiyini göstərir.

Xalis mənfəəti artıb

Marja.az-ın məlumatına görə, 2026-cı ilin yanvar–mart aylarında "Bank of Baku" 8 milyon 289 min manat xalis mənfəət əldə edib. Bu göstərici 2025-ci ilin eyni dövründəki 7 milyon 143 min manat ilə müqayisədə 1 milyon 146 min manat və ya 16 % artım deməkdir.

Mənfəətdə qeydə alınan artım bankın əməliyyat gəlirlərinin genişlənməsi və kredit portfelinin böyüməsi ilə əlaqədardır. Eyni zamanda məqsədli ehtiyatların bir hissəsinin geri qayıtması da xalis mənfəətin yüksəlməsinə müsbət təsir göstərib.

Gəlirləri artıb

2026-cı ilin ilk rübündə "Bank of Baku"nun faiz gəlirləri 50 milyon 707 min manat təşkil edib. Bu, ötən ilin eyni dövrü ilə müqayisədə 9 milyon 978 min manat və ya 24,5 % çoxdur.

Qeyri-faiz gəlirləri isə 6 milyon 175 min manat olub ki, bu da illik müqayisədə 2 milyon 66 min manat və ya 50,3 % artım deməkdir.

Beləliklə, bankın cəmi əməliyyat gəlirləri 56 milyon 882 min manat təşkil edib. Bu göstərici 2025-ci ilin ilk rübündəki 44 milyon 838 min manat ilə müqayisədə 12 milyon 44 min manat və ya 26,9 % artıb.

Faiz gəlirlərinin yüksəlməsi kredit portfelinin genişlənməsi və kredit əməliyyatlarının aktivləşməsi ilə bağlıdır. Qeyri-faiz gəlirlərində yüksək artım isə bankın komissiya və xidmət gəlirlərinin artdığını göstərir ki, bu da gəlir mənbələrinin diversifikasiyası baxımından müsbət göstəricidir.

Xərcləri də artıb

2026-cı ilin ilk rübündə "Bank of Baku"nun faiz xərcləri 22 milyon 306 min manat olub. Bu göstərici ötən ilin eyni dövründəki 15 milyon 100 min manat ilə müqayisədə 7 milyon 206 min manat və ya 47,7 % artıb.

Qeyri-faiz xərcləri isə 21 milyon 380 min manat təşkil edib və bu da illik müqayisədə 1 milyon 167 min manat və ya 5,8 % artım deməkdir.

Beləliklə, bankın cəmi əməliyyat xərcləri 43 milyon 686 min manat olub. 2025-ci ilin eyni dövründə bu göstərici 35 milyon 313 min manat təşkil edirdi. Nəticədə cəmi əməliyyat xərcləri 8 milyon 373 min manat və ya 23,7 % artıb.

Faiz xərclərinin artması əsasən depozit portfelinin genişlənməsi və cəlb edilən vəsaitlərin artması ilə əlaqədardır. Qeyri-faiz xərclərinin daha məhdud artımı isə bankın əməliyyat səmərəliliyini müəyyən səviyyədə qoruduğunu göstərir.

Kredit riskləri üzrə ehtiyatlar

2026-cı ilin ilk rübündə "Bank of Baku"da mümkün zərərlər üçün yaradılmış məqsədli ehtiyatlardan 1 milyon 862 min manat azad olunub. Halbuki 2025-ci ilin eyni dövründə 339 min manat  məqsədli ehtiyatlara ehtiyat ayrılmışdı.

Ehtiyatların bir hissəsinin geri qaytarılması kredit portfelinin keyfiyyətinin yaxşılaşdığını və problemli kreditlərin müəyyən hissəsinin bərpa edildiyini göstərə bilər. Bu faktor bankın xalis mənfəətinə əlavə müsbət təsir göstərib.

2026-cı ilin 31 mart tarixinə "Bank of Baku"nun cəmi aktivləri 1 milyard 225 milyon 131 min manat təşkil edib. 2025-ci ilin sonu ilə müqayisədə aktivlər 72 milyon 655 min manat və ya 6,3 % artıb.

Aktivlərin artımı əsasən kredit portfelinin genişlənməsi və bankın bazarda aktiv fəaliyyət göstərməsi ilə bağlıdır. Bu dinamika bankın biznes miqyasının genişləndiyini göstərir.

Kredit portfeli böyüyüb

2026-cı ilin ilk rübünün sonuna "Bank of Baku"nun cəmi kredit portfeli 964 milyon 142 min manat olub. Bu göstərici 2025-ci ilin sonu ilə müqayisədə 53 milyon 446 min manat və ya 5,9 % artıb.

Kredit portfelinin strukturu belədir:

İstehlak kreditləri: 745 milyon 822 min manat - 45 milyon 891 min manat və ya 6,6 % artıb,

Biznes kreditləri: 156 milyon 463 min manat - 7 milyon 708 min manat və ya 5,2 % artıb,

İpoteka kreditləri: 61 milyon 856 min manat - 155 min manat və ya 0,2 % azalıb.

Kredit portfelində əsas payı istehlak kreditləri təşkil edir və artımın böyük hissəsi də məhz bu seqment hesabına formalaşır. Biznes kreditlərində də artım müşahidə olunur ki, bu da real sektorun maliyyələşdirilməsinin genişləndiyini göstərir. 

Depozit portfeli artıb

2026-cı ilin 31 mart tarixinə bankın depozit portfeli 813 milyon 245 min manat olub. Bu göstərici 2025-ci ilin sonu ilə müqayisədə 72 milyon 988 min manat və ya 9,9 % artıb.

Depozitlərin strukturu:

Fiziki şəxslərin depozitləri: 716 milyon 616 min manat - 47 milyon 256 min manat və ya 7,1 % artıb

Hüquqi şəxslərin depozitləri: 96 milyon 629 min manat - 25 milyon 733 min manat və ya 36,3 % artıb

Depozit portfelinin artması bankın müştəri bazasının genişləndiyini və əmanətçilərin banka olan etimadının yüksək olduğunu göstərir. Xüsusilə hüquqi şəxslərin depozitlərindəki yüksək artım bankın korporativ müştərilərlə əməkdaşlığının gücləndiyini göstərir.

2026-cı ilin ilk rübünün sonuna "Bank of Baku"nun kredit təşkilatları və digər maliyyə institutları qarşısında öhdəlikləri 157 milyon 264 min manat təşkil edib. Bu göstərici 2025-ci ilin sonu ilə müqayisədə 16 milyon 696 min manat və ya 11,9 % artıb.

Bu artım bankın əlavə maliyyə resursları cəlb etməklə kredit fəaliyyətini genişləndirməyə çalışdığını göstərə bilər.

Məcmu kapitalı artıb

2026-cı ilin 31 mart tarixinə "Bank of Baku"nun məcmu kapitalı 176 milyon 384 min manat olub. 2025-ci ilin sonu ilə müqayisədə kapital 9 milyon 71 min manat və ya 5,4 % artıb.

Kapitalın artması bankın mənfəət hesabına kapital bazasını gücləndirdiyini göstərir. Bu isə bankın maliyyə dayanıqlığını artırmaqla yanaşı, gələcəkdə kredit portfelinin genişləndirilməsi üçün əlavə imkanlar yaradır.

Ümumilikdə, 2026-cı ilin ilk rübündə "Bank of Baku" maliyyə göstəriciləri üzrə müsbət dinamika nümayiş etdirib. Bankın gəlirləri, kredit portfeli, depozitləri və aktivləri artıb. Eyni zamanda kredit riskləri üzrə ehtiyatların azalması və kapitalın artması bankın maliyyə dayanıqlığını gücləndirən amillər kimi qiymətləndirilə bilər. Bu göstəricilər bankın bazarda aktiv inkişafda olduğunu göstərir.

İş elanları AzVak.az-da