Azərbaycan Mərkəzi Bankının lisenziyasının qüvvəsini məhdudlaşdırdığı "Atasığorta" ASC istisna olmaqla ölkədə fəaliyyət göstərən 15 sığorta şirkətinin 2025-ci ildə məcmu gəlirləri 1 milyard 520 milyon 582 min  manat təşkil edib.

Bu, 2024-cü ilə nisbətən 12,6 % çoxdur.

Ötən il sığortaçıların məcmu xərcləri isə əvvəlki ilə nisbətən 15,1 % artaraq 1 milyard 340 milyon 461 min manat olub. Şirkətlərdən 13-nün gəlirləri, 6-nın isə xərcləri artıb.

2025-ci ilin yekununda sığortaçıların məcmu maliyyə mənfəəti 180 milyon 121 min manat olub ki, bu da 2024-cü illə müqayisədə 2,5 % azdır. 10 şirkətdə maliyyə mənfəəti artıb, 4 şirkətdə azalıb, əvvəlki il maliyyə mənfəəti əldə etmiş 1 şirkət isə ötən il maliyyə zərəri ilə üzləşib.

2025-ci ildə sığorta şirkətləri 37 milyon 147 min manat məbləğində mənfəət vergisi ödəyib. Bu, 2024-cü ilə nisbətən 13,4 % çoxdur. 15 şirkətdən 8-i vergi ödənişlərini artırıb, 6-sı vergi ödənişlərini azaldıb, əvvəlki il vergi ödəməmiş 1 şirkət ötən il vergi ödəyib.

2025-ci ildə Azərbaycan sığortaçılarının məcmu xalis mənfəəti isə 142 milyon 974 min manat olub. Bu da 2024-cü illə müqayisədə 6 % azdır. Ötən il maliyyə mənfəətini artırmış 10 şirkət həm də xalis mənfəətini artırıb, maliyyə mənfəəti azalmış 4 şirkətin həm də xalis mənfəəti azalıb, əvvəlki ildən mənfəətlə çıxmış 1 şirkət isə ötən ili zərərlə başa vurub.

15 sığortaçısının məcmu aktivləri 3 %-dən çox artıb

Azərbaycan Mərkəzi Bankının lisenziyasının qüvvəsini məhdudlaşdırdığı "Atasığorta" ASC istisna olmaqla ölkədə fəaliyyət göstərən 15 sığorta şirkətinin məcmu aktivləri bu il yanvarın 1-nə 1 milyard 924 milyon 883 min  manat təşkil edib. Bu, ötən il yanvarın 1-nə nisbətən 3,4 % çoxdur.

Hər gün yeni vakansiyalar - AzVak.az-da

2025-ci ildə sığortaçılardan 10-u aktivlərini artırıb, 5-i azaldıb.

Hesabat ilində sığorta şirkətlərinin məcmu uzunmüddətli aktivləri 14,5 % azalaraq 843 milyon 700 min manat, məcmu qısamüddətli aktivləri isə 23,6 % artaraq 1 milyard 81 milyon 183 min manat olub. 4 şirkət uzunmüddətli aktivlərini, 13 şirkət isə qısamüddətli aktivlərini artıra bilib.

Hesabat dövründə sığortaçıların məcmu öhdəlikləri 3,5 % artaraq 1 milyard 400 milyon 563 min manat təşkil edib. Sığortaçılardan 9-da öhdəliklər artıb, 6-da isə azalıb. O cümlədən, şirkətlərin məcmu uzunmüddətli öhdəlikləri 5,2 % artaraq 1 milyard 294 milyon 305 min manat, məcmu qısamüddətli öhdəlikləri isə 13,9 % azalaraq 106 milyon 258 min manat olub. 9 şirkət uzunmüddətli öhdəliklərini, 9 şirkət isə qısamüddətli öhdəliklərini artırıb.

Ötən il sığorta şirkətlərinin məcmu balans kapitalı 3,3 % artaraq 524 milyon 320 min manata çatıb, məcmu nizamnamə kapitalı dəyişməyərək 284 milyon 540 min manat qalıb. Bazar iştirakçılarından 9-u balans kapitalını artırıb.

İş elanları AzVak.az-da

© "Report"