ABŞ Prezidenti Donald Tramp, İrana qarşı bombardman və hücumların 2 həftəlik müddətə dayandırıldığını açıqlayıb. Tramp bu müddətin daimi sülh sazişinin tamamlanması üçün istifadə olunacağını bildirib.

Marja xəbər verir ki, Tramp sosial media üzərindən etdiyi açıqlamada atəşkəsin “iki tərəfli” olacağını vurğulayaraq İran ilə danışıqların irəli mərhələyə çatdığını qeyd edib.

Tramp açıqlamasında bildirib:

“İrana bombardman və hücumları 2 həftəlik müddət üçün dayandırmağı qəbul edirəm. Bu iki həftəlik müddət razılaşmanın yekunlaşdırılması və tamamlanmasına imkan yaradacaq.”

Tramp açıqlamasında atəşkəs qərarında Pakistanın mühüm rol oynadığını vurğulayıb. ABŞ Prezidenti, Pakistanın Baş naziri Şahbaz Şərif və Ordu Komandanı Asım Munir tərəfindən İrana göndərilməsi planlaşdırılan hərbi gücün dayandırılması ilə bağlı müraciətin bu qərara təsir etdiyini bildirib.

Tramp atəşkəs üçün şərt də irəli sürüb. O, İranın Hörmüz Boğazını təhlükəsiz şəkildə açmalı olduğunu vurğulayıb və bu şərtin yerinə yetirilməsi halında hərbi əməliyyatların 2 həftəlik dayandırılacağını təsdiqləyib.

Tramp, əvvəlki fikir ayrılıqlarının böyük hissəsində razılıq əldə olunduğunu bildirərək İran tərəfindən təqdim edilən 10 maddəlik təklifin danışıqlar üçün uyğun əsas yaratdığını qeyd edib.

ABŞ Prezidenti əlavə edib:

“İran ilə uzunmüddətli sülhə dair yekun razılaşmaya çox yaxınıq.”

XXX

ABŞ Prezidenti Donald Tramp “Truth Social” sosial şəbəkəsindəki hesabından etdiyi paylaşımda yazıb:

“Pakistanın Baş naziri Şahbaz Şərif və Feldmarşal Asim Munirlə apardığım danışıqlara əsasən və onların bu gecə İrana göndərilməsi nəzərdə tutulan dağıdıcı gücü dayandırmağımı xahiş etmələri fonunda, həmçinin İran İslam Respublikasının Hörmüz boğazını TAM, DƏRHAL və TƏHLÜKƏSİZ şəkildə açmağa razı olması şərti ilə, mən İranın bombalanmasını və ona qarşı hücumları iki həftə müddətinə dayandırmağa razıyam. Bu, ikitərəfli ATƏŞKƏS olacaq!

Bunun səbəbi odur ki, biz artıq bütün hərbi hədəflərə nail olmuş, hətta onları artıqlaması ilə yerinə yetirmişik və İranla uzunmüddətli SÜLH, eləcə də Yaxın Şərqdə SÜLHlə bağlı yekun saziş üzrə çox irəli mərhələyə çatmışıq. Biz İrandan 10 bəndlik təklif almışıq və hesab edirik ki, bu, danışıqlar aparmaq üçün işlək əsasdır. Keçmişdə mübahisə doğuran müxtəlif məsələlərin demək olar ki, hamısı ABŞ ilə İran arasında razılaşdırılıb, lakin iki həftəlik müddət sazişin yekunlaşdırılması və rəsmiləşdirilməsi üçün imkan yaradacaq.

Amerika Birləşmiş Ştatlarının Prezidenti kimi və eyni zamanda Yaxın Şərq ölkələrini təmsil edərək, bu uzunmüddətli problemin həllə yaxınlaşması mənim üçün şərəfdir. Bu məsələyə diqqətinizə görə təşəkkür edirəm!

Prezident DONALD J. TRUMP”

İş elanları AzVak.az-da