Fransanın qida nəhəngi Danone, sağlam və funksional qidalanma sahəsində böyümə strategiyasını gücləndirmək məqsədilə mühüm bir addım atıb. Marja xəbər verir ki, Fransa şirkəti bitki əsaslı məhsullar, içkilər və qida əlavələri istehsal edən Böyük BritaniyanınHuel şirkətini almaq üçün razılığa gəldiyini açıqlayıb.

Şirkətin bazar ertəsi yaydığı məlumatda bildirilir ki, sövdələşmə “Renew Danone” strategiyasına uyğundur. Satınalma prosesi tənzimləyici qurumların təsdiqi də daxil olmaqla, standart bağlanma şərtlərinə tabedir.

“Financial Times”ın məlumatına görə, Danone süd əsaslı içki tipli qida əvəzediciləri ilə tanınan Huel şirkəti üçün təxminən 1 milyard avro ödəyəcək. Bu addım şirkətin qidalanma yönümlü məhsul seqmentində mövqeyini daha da gücləndirəcək.

“Bloomberg”in məlumatına əsasən, Huel protein tozları və zənginləşdirilmiş içkiləri ilə tanınan Böyük Britaniya şirkətidir. Şirkət protein, yağ və karbohidratlarla zəngin, əsas qida elementləri ilə balanslaşdırılmış hazır içkilər istehsal edir. Bundan əlavə, isti istehlak üçün nəzərdə tutulmuş hazır yeməklər və vegan qida batonları da məhsul portfelinə daxildir.

Huel-in əsas üstünlüklərindən biri birbaşa istehlakçıya satış modelidir. Bununla belə, marka yalnız onlayn platformalarda deyil, həm də supermarket şəbəkələrində mövcuddur. Bu struktur Danone üçün həm yeni nəsil istehlakçılara çıxış, həm də alternativ satış kanallarında mövqenin güclənməsi deməkdir.

Son dövrlərdə Danone xüsusilə sağlam, protein əsaslı və funksional qidalanma trendindən faydalanan iri qida şirkətlərindən biri kimi ön plana çıxır. Arıqlama dərmanlarının geniş yayılması və protein istehlakına marağın artması şirkətin yüksək proteinli məhsullarına tələbi dəstəkləyib. Xüsusilə YoPRO və yüksək proteinli yoqurtlar diqqət çəkir.

Şirkətin portfelində Activia yoqurtları, YoPRO yüksək protein məhsulları və immunitet dəstəkləyici Actimel məhsulları yer alır. Bundan əlavə, Danone ötən il ABŞ mərkəzli tibbi qidalanma şirkəti Kate Farmsı da satın almışdır.

Bu əməliyyat Danone-ın ənənəvi qida şirkətindən daha yüksək əlavə dəyərə malik, sağlamlıq yönümlü və funksional qidalanma məhsullarına keçidini sürətləndirən strateji addım kimi qiymətləndirilir. Huel sövdələşməsi ilə şirkət xüsusilə gənc, şəhərli və praktik qida axtaran istehlakçı kütləsinə daha geniş çıxışı hədəfləyir.

Companies House-un 2024-cü il hesabatına əsasən Huel şirkəti 214 milyon funt sterlinq gəlir əldə edib ki, bu da təxminən 285 milyon dollara bərabərdir.