Biznes, investisiya, texnologiya, sahibkarlıq, liderlik və həyat tərzi mövzularına fokuslanan qlobal media şirkəti Forbes tərəfindən yayımlanan Milyarderlər Siyahısına görə, bu il siyahıda yer alan şəxslərin sayı 3 min 428-ə yüksəlib, milyarderlərin ümumi sərvəti isə 20,1 trilyon dollara çatıb.

Marja.az-ın məlumatına görə, Forbes-un bu il 40-cı dəfə dərc etdiyi Milyarderlər Siyahısı göstərir ki, süni intellekt sahəsində sürətli inkişaf, maliyyə bazarlarında aktivlik və əlverişli maliyyə siyasətləri nəticəsində rekord sayda insan siyahıya daxil olub.

Siyahıya görə, dünyada milyarderlərin sayı ötən illə müqayisədə 400 nəfər artaraq 3 min 428-ə çatıb və yeni rekord səviyyəyə yüksəlib.

Ötən il ərzində milyarderlərin sərvəti sürətlə artmaqda davam edib və ümumi sərvət də görünməmiş templə böyüyüb. Milyarderlərin ümumi sərvəti ötən illə müqayisədə 4 trilyon dollar artaraq 20,1 trilyon dollara çatıb.

Dünya üzrə 20 nəfərin sərvətinin 100 milyard dollar və daha çox olduğu müəyyən edilib.

Musk siyahının lideridir

Tesla, SpaceX, X (keçmiş Twitter) və xAI kimi şirkətlərin sahibi olan Elon Musk (İlon Mask) ardıcıl ikinci il siyahının zirvəsində yer alıb. Onun təxmin edilən sərvəti 839 milyard dollar olaraq qiymətləndirilib və bu, indiyədək qeydə alınmış ən yüksək şəxsi sərvətlərdən biridir. Tesla-nın bazar dəyərinin artması və 2026-cı ildə IPO-su planlaşdırılan SpaceX-in təsiri ilə Musk-ın sərvəti ötən illə müqayisədə təxminən yarım trilyon dollar artıb. O, həmçinin sərvəti 800 milyard dolları keçən ilk şəxs kimi tarixə düşüb və dünyanın ilk trilyoneri olmağa doğru irəliləyir.

Larry Page 257 milyard dollarlıq sərvətlə siyahıda ikinci, Sergey Brin isə 237 milyard dollarlıq sərvətlə üçüncü yerdə qərarlaşıb.

Jeff Bezos 224 milyard dollarlıq sərvətlə dördüncü, Mark Zuckerberg isə 222 milyard dollarlıq sərvətlə beşinci sırada yer alıb.

Trump-ın sərvəti 6,5 milyard dollara çatıb

Donald Trump-ın sərvəti əsasən kripto əməliyyatları və ona qarşı dələduzluq iddiası ilə açılmış işdə cəzanın ləğv edilməsindən sonra 27% artıb. Onun sərvəti təxminən 6,5 milyard dollara yüksəlib və siyahıda 645-ci yeri tutub.

Bu il siyahıya hip-hop musiqisinin məşhur simalarından Dr. Dre, müğənni Beyonce və tennis əfsanəsi Roger Federer də daxil edilib.

Siyahıda 30 yaşdan aşağı 35 milyarder var. Dünyanın ən gənc milyarderi isə Braziliyanın sənaye avadanlıqları şirkəti WEG**-in varisi olan 20 yaşlı Amelie Voigt Trejes-dir.

Siyahının ən yaşlı milyarderi isə 104 yaşlı George Joseph olub. O, ABŞ-da fəaliyyət göstərən "Mercury General" sığorta şirkətinin qurucusu kimi tanınır.

Milyarderlər arasında kişilər üstünlüyü davam etsə də, bu il siyahıya 481 qadın milyarder daxil olub və bu da ümumi siyahının 14%-ni təşkil edir.

Ən çox milyarder ABŞ-dadır

ABŞ 989 milyarder ilə siyahıda ilk yerdə qərarlaşıb və ilk 20-likdə olan 15 nəfər də bu ölkədəndir. ABŞ-dakı milyarderlərin ümumi sərvəti 8,4 trilyon dollar hesablanıb.

ABŞ-ın ardınca 610 milyarder sayı ilə Çin, 229 milyarder sayı ilə isə Hindistan gəlir.

Siyahıda Türkiyədən 40 nəfər var

Bu il siyahıda Türkiyədən 40 nəfər yer alıb.

ABŞ-da məşhur süd məhsulları markası "Chobani"nin qurucusu və baş direktoru Hamdi Ulukaya 13,5 milyard dollarlıq sərvətlə siyahıda 219-cu yeri tutaraq Türkiyənin ən varlı şəxsi olub. Növbəti yerləri 5,3 milyard dollarla Murat Ülker, 4,9 milyard dollarla Cemil Kazancı, 3,8 milyard dollarla Erman Ilıcak və 3,2 milyard dollarla Ferit Şahenk tuturlar.

Bundan başqa, BioNTech şirkətinin həmtəsisçisi və baş direktoru Uğur Şahin, eləcə də ABŞ-da fəaliyyət göstərən aviasiya şirkəti "Sierra Nevada Corporation"ın sahibləri Eren Özmen və Fatih Özmen də siyahıya daxil olan türk əsilli şəxslər arasındadır.

İş elanları AzVak.az-da