Çinin ticarət profisiti rekord səviyyəyə yüksəlib

Çinin ticarət profisiti rekord səviyyəyə yüksəlib

Çinin ticarət profisiti rekord səviyyəyə yüksəlib

Çinin ticarət profisiti 2026-cı ilin yanvar–fevral dövründə 213,6 milyard dollara yüksələrək rekord səviyyəyə çatıb.

Marja xəbər verir ki, Çində ticarət profisitinin ilin ilk iki ayında rekord səviyyəyə yüksəlməsi və ixracın gözləntilərdən xeyli çox artması dünyanın ikinci ən böyük iqtisadiyyatının ABŞ ilə davam edən ticarət gərginliyinə baxmayaraq dayanıqlılığını göstərib.

Çin, Ay Yeni ili tətilinin hər il fərqli tarixlərə təsadüf etməsi səbəbindən yaranan statistik dalğalanmaları azaltmaq üçün adətən yanvar və fevral aylarının ticarət məlumatlarını birlikdə açıqlayır.

Açıqlanan məlumatlara görə, ölkənin ticarət balansı (profisiti) 213,62 milyard dollara yüksəlib. Bu göstərici iqtisadçıların 179,6 milyard dollarlıq proqnozunu üstələyib və dekabr ayında qeydə alınan 114,1 milyard dollarlıq səviyyə ilə müqayisədə əhəmiyyətli artım göstərib.

Gömrük məlumatlarına əsasən, Çinin ixracı yanvar–fevral dövründə illik müqayisədə 21,8% artaraq iqtisadçıların 7,1%-lik gözləntisini üstələyib.

İdxal isə ilin ilk iki ayında ötən ilin eyni dövrü ilə müqayisədə 19,8% artaraq 6,3%-lik proqnozdan yüksək olub.

Hökumət məlumatlarına əsasən, ABŞ ilə ticarət ötən ilin eyni dövrü ilə müqayisədə 16,9% azalaraq 609,71 milyard yuan (88,22 milyard dollar) təşkil edib. Buna baxmayaraq, Çinin Avropa Birliyi ilə ticarəti 19,9% artaraq 998,94 milyard yuana yüksəlib.

Eyni zamanda, ASEAN ölkələri ilə ticarət də 20,3% artaraq 1,24 trilyon yuana çatıb.

Bu ticarət göstəriciləri Çində istehlak inflyasiyasının da üç ildən çox müddətin ən böyük artımını göstərdiyi bir dövrə təsadüf edir. Artım əsasən uzun bayram tətili dövründə istehlak xərclərinin yüksəlməsi ilə bağlı olub.

10.03.2026 10:17