Brent markalı xam neft bazar ertəsi günü Asiya ticarətində 10%-ə yaxın bahalaşaraq bir bareli 80 dollara yüksəlib. Ardınca qiymət bir qədər geriləyərək 77 dollar səviyyələrinə düşüb (Bakı vaxtı ilə saat 09:30-da 6,6% bahalaşma ilə 77,72 dollara ticarət olunub). Ötən cümə günü Brent neftinin qiyməti 73 dollar səviyyələrində idi.

Marja.az xəbər verir ki, analitiklər ABŞ və İsrailin İrana zərbələr endirməsindən sonra Yaxın Şərqin yeni müharibəyə sürüklənməsi fonunda qiymətlərin 100 dollara qədər qalxa biləcəyini proqnozlaşdırırlar.

Tehran gəmilərə bu su yolundan keçməməklə bağlı xəbərdarlıq etdikdən sonra əksər tanker sahibləri, iri neft şirkətləri və treyderlər Hörmüz boğazı vasitəsilə xam neft, yanacaq və mayeləşdirilmiş təbii qaz daşımalarını dayandırıblar. Qlobal neftin 20%-dən çoxu məhz Hörmüz boğazı vasitəsilə daşınır.

Analitiklər, əgər boğazın bağlanması uzunmüddətli olarsa, neftin qiymətinin 100 dolları keçə biləcəyini gözləyirlər. 

Kanadanın maliyyə xidmətləri şirkəti və bazar kapitallaşmasına görə ölkənin ən böyük bankı olan "Royal Bank of Canada"nın (RBC) analitiki Helima Kroft bildirib ki, Yaxın Şərq liderləri Vaşinqtona xəbərdarlıq ediblər ki, İrana qarşı müharibə neft qiymətlərinin 100 dollardan yuxarı qalxmasına səbəb ola bilər.

Hollandiyanın bank və maliyyə xidmətləri şirkəti "Rabobank"ın analitikləri isə daha "mülayim" mövqe - yaxın müddətdə qiymətlərin 90 dollardan yuxarı səviyyədə qalacağını proqnozlaşdırırlar.

OPEC+ neft istehsalçıları qrupu bazar günü aprel ayından etibarən hasilatı gündəlik 206 min barel artırmaq barədə razılığa gəlib. Bu, qlobal tələbatın 0,2%-dən azını təşkil edən təvazökar artımdır.

Norveçin müstəqil enerji tədqiqatı şirkəti "Rystad Energy"nin iqtisadçısı Xorxe Leon bildirib ki, Hörmüz boğazını yan keçmək üçün alternativ infrastrukturdan müəyyən qədər istifadə oluna bilər. Lakin Səudiyyə Ərəbistanının Şərq-Qərb boru kəməri və Əbu-Dabinin boru kəməri vasitəsilə bir hissə yönləndirilsə belə, boğazın bağlanmasının xalis təsiri gündəlik 8–10 milyon barel xam neft tədarükünün itirilməsi olacaq.

"Rystad Energy" qərb bazarlarında da ticarət açıldıqdan sonra qiymətlərin 20 dollar artaraq təxminən 92 dollara çatacağını gözləyir.

Böyük Britaniya bankı "Barclays"ın analitikləri də neftin qiymətinin 100 dollara çata biləcəyini qeyd ediblər.

ABŞ bankı Citi-nin analitikləri davam edən münaqişə fonunda Brent neftinin bu həftə 80-90 dollar aralığında ticarət olunacağını gözləyirlər.

İran böhranı həmçinin Asiya hökumətlərini və neft emalı şirkətlərini ehtiyatları, alternativ daşınma marşrutlarını və tədarük mənbələrini yenidən qiymətləndirməyə vadar edib. Kpler analitikləri bazar günü keçirilən vebinarda bildiriblər ki, Hindistan Yaxın Şərqdən mümkün tədarük itkilərini kompensasiya etmək üçün Rusiya neftinə yönələ bilər.

İş elanları AzVak.az-da