Avropa Mərkəzi Bankı üç il ardıcıl zərər açıqlayıb, sədri isə illik 702 min dollar maaş alıb

Avropa Mərkəzi Bankı üç il ardıcıl zərər açıqlayıb, sədri isə illik 702 min dollar maaş alıb

Avropa Mərkəzi Bankı üç il ardıcıl zərər açıqlayıb, sədri isə illik 702 min dollar maaş alıb

Avropa Mərkəzi Bankı (AMB və ya European Central Bank (ECB)) böhran dövrü siyasətinin təsirlərinin davam etməsi fonunda ardıcıl üçüncü dəfə illik zərər açıqlayıb.

AMB-nin yaydığı məlumata görə, 2025-ci ildə zərər 1,3 milyard avro (1,5 milyard dollar) təşkil edib. Bank 2024-cü ildə tarixində ən yüksək göstərici olan 7,9 milyard avro həcmində zərər elan etmişdi.

Qurum bildirib ki, bu il və ya 2027-ci ildə yenidən mənfəətə qayıtmağı gözləyir. Lakin bu, AMB-nin faiz dərəcələrinin və valyuta məzənnələrinin gələcək səviyyəsindən, həmçinin balansının həcmi və strukturundan asılı olacaq.

AMB istənilən zərərdən asılı olmayaraq effektiv fəaliyyət göstərə biləcəyini bir daha vurğulayıb. Bununla yanaşı, bəzi siyasətçilər gələcək aktiv alışlarında daha ehtiyatlı mövqe tutulmasına çağırıblar.

Bank qeyd edib ki, 2025-ci il üzrə zərər əvvəlki illərdə olduğu kimi gələcək mənfəətlər hesabına silinmək üçün balansda saxlanılacaq. Bu səbəbdən milli mərkəzi banklara mənfəət paylanması həyata keçirilməyəcək.

Christine Lagarde-ın illik gəliri

AMB-nin illik hesabatına əsasən, Christine Lagarde (Kristin Laqard) 2025-ci ildə AMB sədri kimi 595 min avro (701 830 dollar) əməkhaqqı alıb. Onun əsas maaşı 492 min 204 avro olub ki, bu da əvvəlki illə müqayisədə 5,6 faiz artım deməkdir. Bundan əlavə, o, nümayəndəlik xərcləri üçün 21 faiz artımla 103 min 362 avro alıb.

AMB həmçinin İdarə Heyəti üzvləri üçün tibbi, uzunmüddətli qulluq və qəza sığortası üzrə ödənişlər edir, lakin detalları açıqlamır.

Lagarde eyni zamanda Beynəlxalq Hesablaşmalar Bankının (BIS) İdarə Heyətinin üzvü kimi ötən il 130 min 457 İsveçrə frankı (163 390 dollar) məbləğində ödəniş alıb.