“Uzbekneftegaz” ASC və Azərbaycan Dövlət Neft Şirkətinin (SOCAR) nümayəndələri Buxara neft emalı zavodunun səmərəliliyinin artırılmasına yönəlmiş əməkdaşlığın genişləndirilməsini müzakirə ediblər.

Bu barədə “Uzbekneftegaz” ASC-yə istinadən xəbər verir.

Əməkdaşlıq məsələləri “Uzbekneftegaz” ASC-nin idarə heyətinin sədri Abduqani Sanginovun SOCAR-ın törəmə strukturları – “SOCAR Trading” və “SOCAR Downstream Management” rəhbərliyi ilə görüşü zamanı nəzərdən keçirilib.

Tərəflər müasir əməliyyat həllərinin tətbiqi, istehsal proseslərinin rəqəmsallaşdırılması, eləcə də müəssisənin enerji səmərəliliyinin artırılması ilə bağlı təklifləri müzakirə ediblər. Zavodun modernləşdirilməsi üzrə texniki auditin keçirilməsi və praktik tövsiyələrin hazırlanması imkanlarına ayrıca diqqət yetirilib.

Qeyd olunub ki, dövlət başçıları səviyyəsində dəstəklənən Özbəkistan və Azərbaycan arasında strateji tərəfdaşlıq davamlı şəkildə möhkəmlənir və bu, neft-qaz sektorunda əməkdaşlığın genişləndirilməsi üçün əlavə imkanlar yaradır.

Görüşün yekunlarına əsasən, tərəflər praktiki əməkdaşlığın davam etdirilməsi barədə razılığa gəliblər. Həmçinin texniki təhlilin aparılması və növbəti addımlarla bağlı konkret təkliflərin hazırlanması məqsədilə Azərbaycan tərəfinin işçi qrupunun Buxara neft emalı zavoduna səfərinin təşkili barədə razılıq əldə olunub.

Xatırladaq ki, 2024-cü ilin avqust ayında “Uzbekneftegaz” və SOCAR karbohidrogen sahəsində əməkdaşlıq haqqında saziş imzalayıb. Bu saziş Üstyurt platosunda geoloji tədqiqatlara, o cümlədən seysmik kəşfiyyat işlərinə və karbohidrogen hasilatına hazırlıq prosesinə start verib.

Bundan əlavə, 24 iyul 2025-ci il tarixində tərəflər məhsulun pay bölgüsü haqqında saziş (PSA) imzalayıblar. Saziş yaxın 25 il ərzində Özbəkistanın daxili neft tələbatının tam təmin edilməsini nəzərdə tutur. Hasil edilən qaz da daxili bazara yönəldiləcək və ölkə sənayesinin əlçatan və keyfiyyətli neft məhsulları ilə təmin olunmasına xidmət edəcək.

İş elanları AzVak.az-da

© "Report"