"IQM Quantum Computers" Avropada ilk kvant hesablama şirkətlərindən biri kimi birjaya çıxmağı planlaşdırır.

Marja xəbər verir ki, Finlandiyada yerləşən IQM Quantum Computers bazar ertəsi Avropada bu sektorda birinci ictimai şirkətlərdən (səhmləri birjada ticarət olunan açıq səhmdar cəmiyyəti) biri olmaq niyyətini açıqlayıb.

Şirkət Nyu York birjasında listinq üçün xüsusi təyinatlı satınalma şirkəti olan "Real Asset Acquisition Corp" ilə birləşəcək. Şirkətin bəyanatına görə, 1,8 milyard dollar ilkin kapital dəyəri verən razılaşma səhmdarların təsdiqi və digər tənzimləyici şərtlərin yerinə yetirilməsindən asılıdır.

Şirkət əməliyyatın bu ilin iyun ayına yaxın tamamlanmasını və qısa müddət sonra birjaya çıxışın baş tutmasını hədəfləyir. Eyni zamanda Helsinki Fond Birjasında ikili listinq imkanını da nəzərdən keçirir.

2018-ci ildə yaradılan "IQM Quantum Computers" 2025-ci ilin sentyabrında 320 milyon dollar həcmində B seriyası maliyyələşdirmə raundu cəlb edib. Bu raund şirkətin dəyərini 1 milyard dollar səviyyəsinə yüksəldib. İnvestisiya raunduna ABŞ-ın kiber təhlükəsizlik sahəsinə fokuslanan "Ten Eleven Ventures" rəhbərlik edib, Finlandiyanın vençur kapitalı fondu "Tesi" də investisiya yatırıb.

"IQM Quantum Computers" tam inteqrasiya olunmuş, açıq arxitekturalı kvant sistemləri hazırlayır. Bu sistemlər yerli infrastruktura yerləşdirilə və ya bulud vasitəsilə istifadə oluna bilər.

Birləşmə şirkətə əlavə olaraq 300 milyon dollardan çox maliyyə vəsaiti təmin edə bilər. 

Kvant hesablama texnologiyası ənənəvi kompüterlərdən daha sürətli hesablamalar apararaq daha mürəkkəb problemləri həll etmək və böyük həcmli məlumatları emal etmək potensialına malikdir. Bu texnologiyanın tibb, elm və maliyyə kimi sahələrdə sıçrayışlara imkan verə biləcəyi qeyd olunur.

Texnologiya hələ kommersiya mühitində geniş tətbiq olunmasa da və mühüm texniki çətinliklər mövcud olsa da, bəzi analitiklər kvant sektorunun perspektivinə optimist yanaşırlar.

"IQM Quantum Computers"ın həmtəsisçisi və baş icraçı direktoru Jan Goetz bildirib ki, kvant hesablama artıq elmi layihə deyil, müştərilərin istifadə etdiyi və üzərində sistem qurduğu sənayeyə çevrilib.

Şirkət indiyə qədər 13 müştəriyə 21 kvant sistemi satıb və 2025-ci ildə ən azı 35 milyon dollar gəlir əldə edib.

İş elanları AzVak.az-da