Rusiyada xiyarın qiymətindəki kəskin artım ictimaiyyətdə geniş rezonans doğurub.

Marja xəbər verir ki, rəsmi məlumatlara görə, dekabr ayından bəri qiymətlər təxminən ikiqat (111%) artaraq kiloqramı 300 rublu (təxminən 7 manat) keçib. Bəzi ərazilərdə xiyarın kiloqramı 550 rubladək çatır (12 manatdan baha).

Qiymətlərin yüksəlməsi Ukraynada davam edən müharibənin kölgəsində iqtisadi təzyiqlərin hələ də davam etdiyi dövrə təsadüf edir. Ölkədə bu il keçiriləcək parlament seçkiləri səbəbindən artan ərzaq qiymətləri siyasi baxımdan da həssas mövzuya çevrilib.

Siyasətçilərin reaksiyasından sonra antiinhisar qurumu istehsalçı və pərakəndə satıcılara rəsmi məktub göndərərək qiymət artımının səbəblərini tələb edib. Rəhbərlik prosesi yaxından izlədiklərini bildirərək ictimai narazılığın böyüməməsi üçün addımlar atıla biləcəyinə işarə edib.

Müxalifətçi deputat Sergey Mironov, Kənd Təsərrüfatı Nazirliyinin qiymət artımını “mövsümi” faktorlarla izah etməsini tənqid edib. Keçən il kartof qiymətlərinin rekord qırdığını xatırladan Mironov, bu dəfə isə xiyarın “qızıl”a çevrildiyini bildirib.

Mironov əsas ərzaqlara çıxışın çətinləşməsinin vətəndaşlar üzərində təzyiq yaratdığını vurğulayaraq hökuməti daha konkret addımlar atmağa çağırıb.

Ekspertlər əlavə dəyər vergisinin yüksəlməsinin də qiymətlərə təsir etdiyini bildiriblər.

Rusiya Mərkəzi Bankı illik inflyasiyanın 5,5%-ə qədər arta biləcəyini proqnozlaşdırır. Elektrik və təbii qaz ödənişlərindəki artım, yanacaq qiymətlərinin yüksəlməsi və market xərclərindəki artım ailə büdcələrinə əlavə təzyiq göstərir. Müharibənin dördüncü ilinə daxil olunduğu bir vaxtda iqtisadi yavaşlama ilə bağlı narahatlıqlar da gündəmdədir.

Marketlərdə məhdudiyyət, evdə istehsal çağırışı

Xiyar qiymətlərinin idxal olunan banan qiymətlərini belə keçməsi səbəbindən Sibirdəki bəzi marketlər hər bir şəxs üçün satışda kvota tətbiq etməyə başlayıb. Ölkənin aparıcı qəzetlərindən biri isə oxucularına pulsuz xiyar toxumu paylayaraq evdə istehsal çağırışı edib.

Hakimiyyət: “Qiymətlər düşəcək”

Hökumət tərəfdarı deputat Yevgeny Popov sosial media vasitəsilə verdiyi açıqlamada qiymətlərin yaxın zamanda azalacağını və Rusiyanın xiyar istehsalının  özünə yetərli olduğunu bildirib. Lakin sosial mediada bir çox istifadəçi bu açıqlamaya etiraz edib.

İstehsalçılar isə hava temperaturunun yüksəlməsi ilə gələn ay təklifin artacağını və qiymətlərin normallaşacağını bildirirlər. Rəhbərlik keçmişdə oxşar artımların nəzarət altına alındığını xatırladaraq hazırda ictimai sabitliyi təhdid edən bir vəziyyətin olmadığını qeyd edib.