31 dekabr 2025-ci il tarixinə fəaliyyətdə olan bankların cəmi aktivləri 57 milyard 86.2 milyon manat, cəmi öhdəlikləri 49 milyard 743.7 milyon manat, balans kapitalı 7 milyard 342.5 milyon manat olmuşdur. 2025-ci il ərzində bankların cəmi aktivləri 7.7%, cəmi öhdəlikləri 7.2%, balans kapitalı 11% artmışdır. 

Marja.az bu barədə Mərkəzi Bankın "Statistik bülleten Dekabr - 2025" buraxılışına istinadən xəbər verir.

2025-ci ilin dekabr ayında noyabr ayı ilə müqayisədə bankların kredit portfeli 1.3% və ya 377.5 milyon manat artaraq 30 milyard 63 milyon manat olmuşdur.

31 dekabr 2025-ci il tarixinə bankların kredit portfelinin strukturu:

ı) biznes kreditləri – 53.6% (16 milyard 106.3 milyon manat);

ıı) istehlak kreditləri – 31.1% (9 milyard 354.2 milyon manat)

ııı) ipoteka kreditləri – 15.3% (4 milyard 602.5 milyon manat).

Ümumilikdə, 2025-ci il ərzində bankların kredit portfeli 9.4% və ya 2 milyard 585.4 milyon manat (o cümlədən, biznes kreditləri 1 milyard 319.1 milyon manat, istehlak kreditləri 909,3 milyon manat, ipoteka kreditləri 357 milyon manat) artmışdır. 

Xatırladaq ki,  31 dekabr 2024-cü il tarixinə fəaliyyətdə olan bankların cəmi aktivləri 53 milyard 1.4 milyon manat, cəmi öhdəlikləri 46 milyard 383 milyon manat, balans kapitalı 6 milyard 618.4 milyon manat olmuşdu. 2024-cü il ərzində bankların cəmi aktivləri, cəmi öhdəlikləri və balans kapitalı müvafiq olaraq 7.8%, 7.6% və 9.2% artmışdı. 

2025-ci ilin dekabr ayında bankların kredit portfeli 0.4% və ya 109.5 milyon manat artaraq 31 dekabr 2024-cü il tarixində 27 milyard 477.7 milyon manat olmuşdu.

31 dekabr 2024-cü il tarixinə bankların kredit portfelinin strukturu:

ı) biznes kreditləri – 53.8% (14 milyard 787.2 milyon manat);

ıı) istehlak kreditləri – 30.7% (8 milyard 445 milyon manat) 

ııı) ipoteka kreditləri – 15.5% (4 milyard 245.5 milyon manat).

Ümumilikdə, 2024-cü ildə bankların kredit portfeli mütləq ifadədə 4 milyard 294.7 milyon manat (o cümlədən, biznes kreditləri 2 milyard 170.4 milyon manat, istehlak kreditləri 1 milyard 508 milyon manat, ipoteka kreditləri 616,4 milyon manat) artmışdı.

Bankların kredit portfeli (müştəriələrə verilmiş kreditlər) 2025-ci il ərzində 2024-cü ilin yekunu ilə müqayisədə 9.4% və ya 2 milyard 585.4 milyon manat artıb. Bankların kredit portfelində artım 2024-cü ildə 2023-cü illin yekunu ilə müqayisədə 4 milyard 294.7 milyon manat təşkil etmişdi. Beləliklə artım tempi 1 milyard 709,3 milyon manat və ya 39,8% azalıb. Biznes, istehlak və ipoteka kreditləri üzrə artım sürəti zəifləyib.