İki gündür qızılın unsiyasının qiyməti ucuzlaşan dollar və artan geosiyasi risklərin təsiri ilə 5 min dolların üzərində qalır. İnvestorların dövlət istiqrazları və valyutalardan çıxışı qiymətli metallara olan tələbi gücləndirib.

Marja xəbər verir ki, külçə qızıl çərşənbə axşamı günü 1,4 faizə qədər bahalaşaraq ardıcıl yeddinci ticarət günündə də artım qeydə alıb. ABŞ Prezidenti Donald Trampın Cənubi Koreya məhsullarına tətbiq olunan gömrük rüsumlarını artırmaq təhdidi və Vaşinqtonun Yapon yeni üçün dəstək addımları ata biləcəyinə dair gözləntilər dolları təxminən son dörd ilin ən aşağı səviyyəsinə endirib. Bu amillər qızılı qlobal alıcılar üçün daha cəlbedici edib. Gümüş isə təxminən 7 faiz bahalaşıb.

Son iki ildə dəyərini iki dəfədən çox artıran qızıl - bazarlardakı qeyri-müəyyənliyin və risk qavrayışının mühüm göstəricisi olaraq qalır. 1979-cu ildən bəri ən güclü illik bahalaşmanı nümayiş etdirən sarı metal, bu il də narahatlıqları fonunda 17 faiz bahalaşıb.

Tramp administrasiyasının son dövrlərdə Qrenlandiya ilə bağlı çıxışları, Venesuelaya mümkün hərbi müdaxilə ehtimalları və ABŞ Mərkəzi Bankının müstəqilliyinə dair açıqlamaları bazarlardakı gərginliyi daha da artırıb. ABŞ Prezidentinin Cənubi Koreyaya yönəlik son xəbərdarlığı, Kanadanın Çinlə ticarət sazişi imzalaması halında ona 100 faiz gömrük rüsumu tətbiq ediləcəyi təhdidindən sonra səsləndirilib.

Bazar məlumatları spekulyatorların qızıl mövqelərini artırdığını göstərir, opsion investorları isə qiymət yüksəlişinin davamına hazırlaşır.

İnvestorlar hazırda Trampın FED-in yeni sədri ilə bağlı seçimini gözləyir. Faiz endiriminə tərəfdar olan şəxsin FED sədri vəzifəsinə təyin olunması faiz endirimlərinə dair gözləntiləri gücləndirərək faiz gəliri olmayan qızıl üçün dəstəkləyici amil ola bilər. Bununla yanaşı, FED-in qısa müddətdə faiz endirimlərinə fasilə verməsi gözlənilir.

Bakı vaxtı ilə saat 09:44-də qızılın unsiyasının qiyməti 1,4 faiz artımla 5081 dollardan ticarət olunub. Gümüş 5,8 faiz bahalaşaraq 109,78 dollara yüksəlib, lakin əvvəlki sessiyada qeydə alınan rekord səviyyələrdən sonra qismən geri çəkilib. Platin və palladium da dəyər qazanıb.

Dünən qızılın unsiyasının qiyməti 5111 dolları test edib. Növbəti psixoloji mərhələnin 5300 dollara yaxın olduğu təxmin edilir.