Tarixdə ilk dəfə gümüşün qiyməti 95 dolları keçib

Tarixdə ilk dəfə gümüşün qiyməti 95 dolları keçib

Comex birjasında gümüşün birja qiyməti yeni tarixi rekorda yüksəlib. Tədarük çatışmazlığı ilə bərabər, qiymətlərin artmasına geosiyasi gərginliyin kəskinləşməsi səbəbindən investorların qoruyucu (təhlükəsiz) aktivlərə yönələn tələbi də dəstək verib. Comex birjasında gümüş fyuçerslərinin (mart) kotirovkaları 7,72% artaraq 95,37 ABŞ dollarına çatıb.

Tarixdə ilk dəfə gümüşün qiyməti 95 dolları keçib

Gümüşün birja qiymətləri tarixi maksimumu yeniləyib.

Marja xəbər verir ki, çərşənbə axşamı, 20 yanvar 2026-cı il tarixində Comex birjasında mart ayı tədarüklü gümüş fyuçersləri 7,72% bahalaşaraq 1 unsiya üçün 95,37 dollara yüksəlib. Beləliklə, gümüşün unsiya qiyməti tarixdə ilk dəfə 95 dollar həddini aşıb.

Gümüş qiymətlərinin rekord səviyyəyə çatması investorların aktivlərini qorumaq istəyi ilə bağlıdır. Buna səbəb ABŞ Prezidenti Donald Trampın Qrenlandiya ətrafındakı mübahisə fonunda bəzi Avropa ölkələrinə qarşı əlavə gömrük rüsumlarının tətbiqi ilə bağlı xəbərdarlıq etməsi olub. Bu isə təhlükəsiz aktivlərə tələbi artırıb.

ABŞ Prezidenti Donald Tramp bildirib ki, 1 fevral 2026-cı ildən etibarən Danimarka, Norveç, İsveç, Fransa, Almaniya, Böyük Britaniya, Niderland və Finlandiyadan ABŞ-a göndərilən bütün mallara 10%-lik gömrük rüsumu tətbiq olunacaq. Trampın sözlərinə görə, Qrenlandiyanın alınması ilə bağlı razılaşma əldə edilənədək bu ölkələr rüsum ödəməyə davam edəcəklər. Avropa İttifaqı ölkələri də ABŞ-a qarşı cavab rüsumlarının tətbiqini və Amerika şirkətlərinin öz bazarlarına çıxışının məhdudlaşdırılmasını nəzərdən keçirirlər.

20.01.2026 17:19