ABŞ Prezidenti Donald Tramp Amerika şirkətlərinə çip satışına icazə veriləcəyini, lakin satış məbləğinin dollar ekvivalenti üzərindən ABŞ-nin 25 faiz pay alacağını açıqlayıb.

Marja xəbər verir ki, Tramp bu modelin həm şirkətlərə, həm də ABŞ iqtisadiyyatına milyardlarla dollar qazandıracağını bildirib.

Ağ Evdən yayılan açıqlamada Trampın imzaladığı sərəncamla yarımkeçiricilər, yarımkeçirici istehsalı avadanlıqları və onların törəmə məhsullarının idxalı ilə bağlı milli təhlükəsizlik narahatlıqlarının nəzərdən keçirildiyi qeyd olunub.

Açıqlamada Nvidia H200 və AMD MI325X kimi bəzi qabaqcıl çiplərə 25 faiz tarif tətbiq ediləcəyi, lakin bunun ABŞ-nin texnologiya tədarük zəncirinin qurulmasını və yarımkeçirici törəmə məhsullarının yerli istehsal gücünün artırılmasını dəstəkləmək məqsədilə idxal edilən çiplərə şamil olunmayacağı bildirilib.

Həmçinin açıqlamada Trampın yaxın gələcəkdə yarımkeçiricilər və onların törəmə məhsullarının idxalına daha genişmiqyaslı tariflər tətbiq edə biləcəyi və daha əvvəl elan edildiyi kimi, yerli istehsalı təşviq etmək məqsədilə tarif kompensasiya proqramı həyata keçirə biləcəyi qeyd olunub.

“Bu çiplərin satışından 25 faiz qazanc əldə edəcəyik”

Tramp Ağ Evdə məsələ ilə bağlı açıqlama verib.

Yarımkeçirici şirkətlərinin ən qabaqcıl olmayan çipləri sata biləcəyini deyən Tramp, “Çin onları istəyir, digərləri də istəyir və biz bu çiplərin satışından 25 faiz qazanc əldə edəcəyik”, – deyə bildirib.

Tramp şirkətlərə çip satışına icazə veriləcəyini, lakin satışın dollar dəyəri üzərindən ABŞ-nin 25 faiz pay alacağını vurğulayıb.

“Həm şirkətlər, həm də ABŞ qazanacaq”

Bunun çox yaxşı bir razılaşma olduğunu bildirən Tramp, həm şirkətlərin, həm də ABŞ-nin milyardlarla dollar qazanacağını söyləyib.

Tramp satışına icazə verilən çiplərin Blackwell və ya Rubin kimi ən qabaqcıl çiplər olmadığını xüsusi olaraq qeyd edib.

ABŞ Prezidenti Donald Tramp ötən ilin dekabr ayında sosial media hesabında paylaşdığı açıqlamada, milli təhlükəsizliyin güclü şəkildə qorunmasını təmin edəcək şərtlər çərçivəsində Nvidia-nın “H200” çiplərini Çin və digər ölkələrdəki təsdiqlənmiş müştərilərə göndərməsinə icazə veriləcəyini bildirmişdi. Bu satışlardan 25 faiz vergi alınacağını qeyd edən Tramp, eyni yanaşmanın AMD, Intel və digər iri Amerika şirkətləri üçün də tətbiq oluna biləcəyini demişdi.