ABŞ Prezidenti Donald Tramp iranlılara etirazları davam etdirmələri çağırışı edərək, “İranlı vətənpərvərlər, etirazlarınıza davam edin. Yardım yoldadır” deyib.

Marja xəbər verir ki, ABŞ Prezidenti Donald Tramp, İranda 28 dekabr tarixində başlayan və qısa müddətdə hökumət əleyhinə etirazlara və zorakılıq hadisələrinə çevrilən nümayişlərlə bağlı açıqlama verib. İranlılara etirazları davam etdirmələri çağırışı edən Tramp bildirib:

“İranlı vətənpərvərlər, etirazlarınıza davam edin, dövlət qurumlarını ələ keçirin. Qatillərin və istismarçıların adlarını qeydə alın. Böyük bir bədəl ödəyəcəklər. Etirazçıların mənasız şəkildə öldürülməsi dayanana qədər İran rəsmiləri ilə olan bütün görüşlərimi ləğv etdim. Yardım yoldadır.”

İranda başlayan etirazlar fonunda Trampın açıqlamaları ilə Tehran–Vaşinqton xəttində gərginlik artıb.

Tehran yaxınlığındakı bir məhkəmə-tibbi ekspertiza müəssisəsinin həyətindən yayılan görüntülərdə cəsədlərin qurumun həyətində sıra ilə düzülməsi diqqət çəkib. İrandakı etirazlarda ölənlərin sayının 646-ya yüksəldiyi bildirilib. İran Məhkəmə-Tibbi Ekspertiza Qurumunun rəhbəri, həlak olanların əksəriyyətinin “silahlı terrorçular” tərəfindən kəsici alətlərlə həyati orqanları hədəf alınaraq və ya yaxın məsafədən ov tüfəngi ilə vurularaq öldürüldüyünü açıqlayıb.

İsraildən də diqqətçəkən açıqlama gəlib. İsrail Müdafiə Qüvvələri (IDF) “sürpriz ssenarilərə qarşı” həyəcan vəziyyətində olduqlarını bildirib. İran Silahlı Qüvvələrinin Baş Qərargah rəisi Əbdürrəhim Musevi isə ABŞ və İsrailin İrana İŞİD terror təşkilatının silahlı üzvlərini göndərdiyini, onların da İran xalqına və təhlükəsizlik qüvvələrinə qarşı hücumlar həyata keçirdiyini deyib. Almaniya kansleri Merz də diqqətçəkən açıqlama ilə çıxış edib. 

AB İrana qarşı əlavə tədbirlərə hazırlaşır

Avropa Birliyi (AB) Komissiyasının sədri Ursula fon der Lyayen, İranda “həddindən artıq güc tətbiq edilməsini və azadlıqların davamlı şəkildə məhdudlaşdırılmasını” pislədiyini bildirərək, rejimə qarşı sürətlə əlavə tədbirlərin görüləcəyini açıqlayıb.

Fon der Lyayen "X" sosial media platformasında İrandakı etirazlarla bağlı paylaşım edib. Avropa Parlamentinin (AP) İranın bütün diplomatik personalı və nümayəndələrinin Avropa Parlamenti binalarına girişini qadağan etməsindən sonra açıqlama verən fon der Lyayen, “İranda artan ölümlər dəhşət doğurur” ifadəsini işlədib.

İş elanları AzVak.az-da