İnvestorların ABŞ-nin Venesuela Prezidenti Nikolas Maduronun ələ keçirilməsinin qlobal xam neft təklifinə təsirlərini və bunun ölkənin enerji sektoru üçün nəticələrini dəyərləndirməsi fonunda neft qiymətləri dalğalanır.

Marja xəbər verir ki, Brent markalı neft günün əvvəlində 1,2 faizə qədər ucuzlaşdıqdan sonra itkilərini kompensasiya edərək bir bareli təxminən 61 dollar səviyyəsinədək yüksəlib.  Bakı vaxtı ilə saat 09:20-də Brent nefti 0,4% ucuzlaşma ilə 60,48 dollara ticarət olunub. ABŞ xam nefti (WTI) isə 57 dolların üzərində qalıb. Həftə sonu Venesuelada baş verən sarsıntılara baxmayaraq, OPEC üzvü olan bu ölkə qlobal təklifin yalnız kiçik bir hissəsini təşkil edir və bazar artıq artan təklif artıqlığı ilə mübarizə aparır.

Capital Economics-in baş iqtisadçısı Neil Şirinq qeydlərində bildirib: “Venesuela istehsalında hər hansı qısamüddətli fasilə başqa yerlərdə artan istehsal hesabına asanlıqla kompensasiya oluna bilər.” Şirinq əlavə edib: “Növbəti təxminən bir il ərzində qlobal təklif artımının neft qiymətlərini 50 dollara doğru itələyəcəyini gözləyirik.”

Venesuela bir vaxtlar neft istehsalında güclü ölkə idi, lakin son iyirmi ildə istehsal ciddi şəkildə azalıb və bu gün qlobal təklifin 1 faizindən də azını təmsil edir. İstehsal olunan neftin böyük hissəsi Çinə ixrac olunur. OPEC+ və digər istehsalçıların tələbin zəiflədiyi bir şəraitdədaha çox barel çıxarması ilə bu il bazar böyük təklif artıqlığı ilə üz-üzədir.

Bazar günü OPEC+ birinci rübdə təklif artımlarına (hasilatın artırılmasına) fasilə vermək planını təsdiqləyib. Səudiyyə Ərəbistanı və Rusiyanın rəhbərlik etdiyi qrupun nümayəndələrinin sözlərinə görə, 10 dəqiqəlik videokonfrans zamanı Venesuela gündəmə gətirilməyib. Nümayəndələr vəziyyətin inkişafına necə reaksiya veriləcəyini qiymətləndirmək üçün hələ tez olduğunu bildiriblər.

Məsələ ilə tanış olan mənbələrin məlumatına görə, şənbə günü ABŞ-nin hücumlarına baxmayaraq, Venesuelanın Xose Limanı və Amuay neftayırma zavodu da daxil olmaqla neft infrastrukturu, eləcə də Orinoko Kəmərindəki əsas istehsal sahələri zərər görməyib. Lakin tankerların saxlanılması da daxil olmaqla Maduronun hakimiyyətinə qarşı son ABŞ təzyiqləri ölkəni bəzi neft quyularını bağlamağa məcbur edib.

Tramp şənbə günü ölkənin enerji sektoruna qarşı sanksiyaların qüvvədə qalacağını bildirib, lakin ABŞ şirkətlərinin sektoru yenidən qurmağa və istehsalı canlandırmağa kömək edəcəyini də qeyd edib. Bunun ehtimal ki, uzunmüddətli bir proses olacağını vurğulayıb. Tramp bazar ertəsi jurnalistlərə açıqlamasında şirkətlərin Venesuelaya daxil olmağı “çox istədiklərini” deyib.

"Karobaar Capital LP"nin investisiya direktoru Haris Xurşid isə bildirib: “ABŞ investisiyaları və real mənada sanksiyaların yumşaldılması zaman alır; barellər bir gecədə geri qayıtmır.” Xurşid əlavə edib: “Hazırda təklif artıqlığı daha dominant görünür və geosiyasəti üstələyərək qiymətlər üzərindəki təzyiqi qoruyur.”