Nintendo, yeni nəsil flaqman konsoluna artan tələbat sayəsində cari maliyyə ilində Switch 2 satış proqnozunu artırıb.

Marja.az-ın məlumatına görə, Yaponiyanın oyun nəhəngi bildirib ki, 2026-cı ilin martında başa çatan maliyyə ili üzrə Switch 2 satışlarının əvvəlki 15 milyon ədədlik proqnoz əvəzinə 19 milyon ədəd olacağı gözlənilir.

Nintendo-nun 30 sentyabrda başa çatan maliyyə ilinin ikinci rübü üzrə göstəriciləri LSEG proqnozları ilə müqayisədə belə olub:

Gəlir: 527,2 milyard yen (3,7 milyard dollar) – gözlənilən 461,76 milyard yendən yüksək;

Xalis mənfəət: 102,9 milyard yen – gözlənilən 63,6 milyard yendən çox.

Gəlir ötən ilin eyni dövrü ilə müqayisədə 90%-dən çox, mənfəət isə 270%-dən çox artıb.

Nintendo, iyun ayında istifadəyə verilən Switch 2 konsolunun uğuru fonunda yüksəliş yaşayır – şirkətin səhmləri ilin əvvəlindən bəri təxminən 40% bahalaşıb.

Şirkət sentyabr rübündə 4,54 milyon ədəd Switch 2 satıldığını bildirib. Bu, buraxılışdan dərhal sonra qeydə alınan “yüksək tələbat” dövrü ilə müqayisədə azalma olsa da, Nintendo qeyd edib ki, “performans güclü olaraq qalır”. Ümumilikdə, satışların başladığı gündən bəri 10,36 milyon ədəd Switch 2 satılıb.

“Mario Kart World” və “Donkey Kong Bonanza” oyunları, Switch 2-nin satışa çıxarılmasından sonra Nintendo-nun ən populyar oyunları sırasına daxil olub. Bu oyunlar rüb ərzində 11,95 milyon ədəd proqram təminatı satışına töhfə verib.

Nintendo-nun Switch 2 ilə bağlı optimizmi şirkəti digər maliyyə proqnozlarını da artırmağa sövq edib.

Kyotoda yerləşən şirkət maliyyə ili üçün ümumi satışların 2,25 trilyon yen olacağını, əvvəlki 1,9 trilyon yen proqnozunu yenilədiyini bildirib. Həmçinin, xalis mənfəət proqnozu da təxminən 17% artırılaraq 350 milyard yen səviyyəsinə qaldırılıb.

Yeni oyunlara fokus

2017-ci ildə təqdim edilən orijinal Nintendo Switch, şirkətin tarixində Nintendo DS-dən sonra ikinci ən çox satılan konsol olub. Həm evdə, həm də yolda oynamaq imkanı verən konsol, hibrid  oyunçular arasında böyük rəğbət qazanıb.

Bəzi analitiklər Switch 2-nin əvvəlki modeldən yetərincə fərqli olub-olmayacağını sual edirdilər. Lakin indiyədək ilkin satış göstəriciləri Nintendo üçün uğurlu görünür. İnvestorlar isə hazırkı rüb və bayram mövsümündə gözlənilən tələbi qiymətləndirəcəklər.

Nintendo, əvvəlki illərdə Super Mario və Pokémon kimi məşhur franşizalar üzərindən oyunlar buraxmaqla orijinal Switch-in satışlarını uzun müddət yüksək səviyyədə saxlamışdı. Şirkət indi bu strategiyanı Switch 2 ilə də təkrarlamağı planlaşdırır.

Ötən ay Nintendo “Pokémon Legends: Z-A” oyununu və bu oyunla birlikdə satılan Switch 2 konsol paketini təqdim edib. “Kirby Air Riders” və “Metroid Prime 4: Beyond” oyunları da bu il ərzində satışa çıxarılacaq.

Nintendo-nun gəlir hesabatında qeyd olunur:

“Buraxılan oyunların uğurunu davam etdirməyə və yeni oyunları fasiləsiz təqdim etməklə platformanın istifadəçi bazasını genişləndirməyə çalışacağıq.”