Azərbaycandakı bank olmayan kredit təşkilatları (BOKT) bu ilin yanvar-sentyabr aylarını 60,3 milyon manat xalis mənfəətlə başa vurub.

Azərbaycan Mərkəzi Bankının statistikasına görə, bu, ötən ilin eyni dövrünə nisbətən 2,5 dəfə azdır.

9 ay ərzində BOKT-ların əməliyyat gəlirləri 330,4 milyon manat (illik müqayisədə 4,1 % çox), əməliyyat xərcləri 164,1 milyon manat (31 % çox), xüsusi ehtiyatlara ayırmaları 97,5 milyon manat (9,5 dəfə çox), gözlənilməz gəlirləri 0,2 milyon manat (1 il bundan əvvəl olmayıb) mənfəət vergisi ödəmələri isə 8,7 milyon manat (73,2 % az) təşkil edib.

Bu il oktyabrın 1-nə BOKT-ların aktivləri 1 milyard 44,1 milyon manat olub ki, bu da 1 il əvvələ nisbətən 6,55 % çoxdur. Bunun 747,7 milyon manatı müştərilərə verilmiş xalis kreditlərdir. Son 1 ildə sektorun kredit portfeli 8,7 % böyüyüb.

Hesabat dövründə BOKT-ların öhdəlikləri 5 % artaraq 543,4 milyon manata, balans kapitalı isə 8,3 % artaraq 500,7 milyon manata çatıb.

Xredit ittifaqları 9 ayda 0,1 milyon manat xalis mənfəət əldə edib

Azərbaycandakı kredit ittifaqları bu ilin yanvar-sentyabr aylarını 0,1 milyon manat xalis mənfəətlə başa vurub. Halbuki, kredit ittifaqları ötən ilin eyni dövründən 0,5 milyon manat zərərlə çıxmışdı.

9 ay ərzində kredit ittifaqlarının gəlirləri 1,7 milyon manat (illik müqayisədə 6,3 % az), xərcləri 1 milyon manat (eyni qalıb), xüsusi ehtiyatlara ayırmaları 0,6 milyon manat (2 dəfə az) təşkil edib, mənfəət vergisi ödəmələri olmayıb (100 % azalıb).

Bu il oktyabrın 1-nə kredit ittifaqlarının aktivləri 13 milyon manat olub ki, bu da 1 il əvvələ nisbətən 2,4 % çoxdur. Bunun 11,1 milyon manatı müştərilərə verilmiş xalis kreditlərdir. Son 1 ildə sektorun kredit portfeli 1,8 % böyüyüb.

Hesabat dövründə kredit ittifaqlarının öhdəlikləri 18,2 % azalaraq 2,7 milyon manata, balans kapitalı isə 9,6 % artaraq 10,3 milyon manata düşüb.

İş elanları AzVak.az-da

 © "Report"