ABŞ-da federal hökumət çərşənbə axşamı gecə yarısından etibarən rəsmi olaraq fəaliyyətini dayandırıb. Buna Respublikaçıların təqdim etdiyi maliyyələşdirmə qanun layihəsinin Senatda kifayət qədər səs toplamaması səbəb olub.

MArja xəbər verir ki, dövlət qurumları yalnız zəruri xidmətləri davam etdirəcək, ölkə üzrə hava nəqliyyatı idarəçiliyindən tutmuş fəlakət yardımlarına qədər bir çox sahədə fasilələr gözlənilir.

Respublikaçıların yeddi həftəlik müvəqqəti maliyyələşdirmə layihəsi 55 lehinə, 45 əleyhinə səslə qəbul edilməyib. Qanunun keçməsi üçün 60 səs lazım idi. Bu, sentyabrın ortalarında uğursuzluğa düçar olmuş eyni layihənin Senatda ikinci dəfə rədd edilməsidir.

Layihəyə demokrat senatorların böyük əksəriyyəti qarşı çıxıb. Yalnız Pensilvaniyadan Con Fetterman, Nevadadan Ketrin Kortes Masto və Demokratlara yaxın olan müstəqil senator Meyndən Angus Kinq dəstək verib. Respublikaçılardan isə yalnız Kentukkidən Rand Pol əleyhinə səs verib.

Demokratların dəstəklədiyi alternativ maliyyə layihəsi də çərşənbə axşamı əvvəlki səsvermədə Senatda rədd edilmişdi. Respublikaçıların layihəsi isə sentyabrda Nümayəndələr Palatasında qəbul olunsa da, Senatda irəliləyə bilməyib.

Siyasi böhran əsasən səhiyyə və sığorta xərcləri ətrafında toplanıb. Demokratlar maliyyələşdirmə paketinə səhiyyə subsidiyalarının daxil edilməsini tələb edir, Respublikaçılar isə bu məsələnin ayrıca və daha sonra müzakirə olunmasının tərəfdarıdır.

Tramp tərəfləri ittiham edib

ABŞ prezidenti Donald Tramp, çərşənbə axşamı keçirilən səsvermədən əvvəl hökumət bağlanacağı təqdirdə daha çox federal işçini işdən çıxarmaqla hədələyib. Tramp və Respublikaçılar məsuliyyəti əsasən Demokratların üzərinə atsa da, demokrat liderlər əksinə, böhranın səbəbini Respublikaçıların yaratdığını, nəticədə milyonlarla amerikalının yaxın aylarda daha yüksək səhiyyə xərcləri ilə üzləşəcəyini bildiriblər.

Hökumətin neçə müddət bağlı qalacağı hələ də qeyri-müəyyəndir. 1981-ci ildən bəri Konqres 16 dəfə hökuməti bağlayıb. Ən uzun fasilə Trampın ilk prezidentlik dövründə – 2018-ci ilin sonu və 2019-cu ilin əvvəlində 35 gün davam etmişdi. Büdcə İdarəsinin hesablamalarına görə, həmin bağlanma ABŞ iqtisadiyyatına 11 milyard dollar zərər vurmuş və 800 minə yaxın federal işçinin fəaliyyətinə təsir göstərmişdi.

Senatdakı Respublikaçıların lideri Con Tün isə bu həftənin sonuna doğru Nümayəndələr Palatasında təsdiqlənmiş maliyyələşdirmə layihəsinin səsverməyə çıxarılacağını açıqlayıb.

İş elanları AzVak.az-da