Ötən gün ABŞ-da İstehsal Qiymətləri İndeksinin (PPI) proqnozların altında açıqlanması fonunda dollar major valyutalar qarşısında ucuzlaşıb, lakin bir qədər sonra itirdiyi mövqeləri bərpa edə bilib. EUR/USD valyuta cütlüyü ilk öncə 1.16930 səviyyəsindən 1.17300-ə qədər bahalaşıb, sonra isə 1.16920 səviyyəsinədək geriləyib. Eyni müddət ərzində GBP/USD cütlüyü 1.35630 həddindən 1.35190 həddinədək enib.

Amerikada İstehsal Qiymətləri İndeksi (PPI) avqustda aylıq ifadədə 0.1% azalıb. Son dörd ay ərzində ilk dəfə qeydə alınan azalma analitiklər üçün gözlənilməz olub. Belə ki, onlar orta hesabla göstəricinin 0.3% artacağını proqnozlaşdırmışdılar. Ötən ilin avqustu ilə müqayisədə PPI 2.6% artıb. Proqnoz isə 3.3%-lik artımı nəzərdə tuturdu.

Bu statistik məlumatlar istehlak qiymətlərinin artım tempinin zəifləməyə davam edəcəyinə dair proqnozları gücləndirib. Nəticədə bir çox analitik ABŞ Federal Ehtiyatlar Sisteminin (FED) gələn həftə faiz dərəcəsini birdən-birə 50 baza bəndi endirə biləcəyini proqnozlaşdırır.

ABŞ fond indeksləri “S&P 500” və “Nasdaq” növbəti dəfə rekord səviyyəyə yüksəlib, “Dow Jones” isə çərşənbə günü keçirilən ticarət sessiyasının yekununda enib. 

“Oracle Corp.”-un səhmlərinin qiyməti çərşənbə günü demək olar ki, 41% artıb. Dünyanın ən iri proqram təminatı istehsalçılarından biri olan şirkət iyun–avqust aylarını əhatə edən birinci maliyyə rübündə “bulud” seqmentində gəlirlərini 28% artırıb. Şirkət bütün maliyyə ili üzrə bu göstəricinin 77% artacağını proqnozlaşdırıb.

“Apple Inc.”-in səhmlərinin dəyəri isə yeni “iPhone 17”-nin uğursuz çıxışı səbəbindən 3.2% ucuzlaşıb.

“Financial Times” qəzeti yazıb ki, ABŞ prezidenti Donald Tramp Avropa İttifaqına Rusiya üzərində təzyiqi artırmaq məqsədilə Çin və Hindistana qarşı 100%-lik rüsumlar tətbiq etməyi təklif edib. Nəşrin mənbələrindən biri bildirib ki, ABŞ qəti addımlar atmağa hazırdır, lakin yalnız Avropa onları dəstəklədiyi halda. Həmçinin, qeyd olunur ki, Vaşinqton Brüsselin Hindistan və Çinə qarşı tətbiq edəcəyi istənilən tarifləri dəstəkləməyə hazırdır.

Beynəlxalq reytinq agentliyi “Fitch” isə 2025-ci ildə qlobal ÜDM-in artımı üzrə proqnozunu 2.2%-dən 2.4%-ə yüksəldib. Qərara əsas kimi ikinci rübün proqnoz olunandan daha güclü iqtisadi göstəriciləri göstərilib. Avrozona üzrə ÜDM-in artım proqnozu da 0.8%-dən 1.1%-ə qaldırılıb.

Bu gün Avropa Mərkəzi Bankının (ECB) faiz dərəcəsi ilə bağlı qərarı investorların diqqət mərkəzində olacaq əsas xəbərlərdən biridir. Eləcə də, ABŞ-da açıqlanacaq İstehlak Qiymətləri İndeksi (CPI) göstəriciləri bazar iştirakçılarının marağına səbəb olacaq.

Məlumat İnvest-AZ İnvestisiya Şirkətinin analitikləri tərəfindən hazırlanıb.