Qlobal bazarların yaxından izlədiyi avqust ayına dair ABŞ-ın qeyri-kənd təsərrüfatı məşğulluq göstəriciləri açıqlanıb.

Marja xəbər verir ki, ölkədə avqust ayında məşğulluq bazarından zəif siqnallar gəlib.

ABŞ-da qeyri-kənd təsərrüfatı məşğulluğu avqustda 22 min artıb. Bloomberg-in sorğusunda iştirak edən iqtisadçıların gözləntisi artımın 75 min olacağı istiqamətində idi.

Daha əvvəl 73 min olaraq açıqlanan iyul ayı məşğulluq artımı 79 minə dəyişdirilib. Son iki ay üzrə isə 21 minlik aşağıya doğru korrektə aparılıb.

Məlumatlar avqust ayında ölkədə işsizliyin 4,2 faizdən 4,3 faizə yüksəldiyini göstərib. Bu göstərici ABŞ-da 2021-ci ildən bəri ən yüksək səviyyəyə çatıb.

İnflyasiya göstəriciləri baxımından diqqətə alınan orta saatlıq maaş üzrə aylıq artım 0,3 faiz olmaqla gözləntilərə paralel reallaşıb.

Orta saatlıq maaşda eyni dövrdə illik artım 3,7 faiz olub. Bu göstəriciyə dair gözlənti isə 3,8 faiz təşkil etmişdi.

Zəif ABŞ göstəricilərindən sonra qızılda yeni rekord

Qızıl, FED-in faiz endirimi edəcəyi gözləntilərini gücləndirən məşğulluq məlumatlarının ardından yeni rekordunu müəyyənləşdirib.

Məlumatlardan sonra, qızılın unsiyasının qiyməti 1 faiz də artımla 3 min 586 dollara qalxaraq tarixi zirvəni yeniləyib. Son üç ildə həm qızıl, həm də gümüş iki dəfədən çox dəyər qazanıb. Geosiyasi risklər, iqtisadi qeyri-müəyyənliklər və qlobal ticarətdəki problemlər "təhlükəsiz liman" tələbini artırıb. ABŞ Prezidenti Donald Trampın bu il FED-ə yönələn artan tənqidləri isə mərkəzi bankın müstəqilliyinə dair narahatlıqları artırıb. Tramp qısa müddətdə FED-də “çoxluğu ələ keçirəcəyini” və faizləri azaldacağını bəyan etmişdi.

Neft 2 faizdən çox ucuzlaşıb

ABŞ-da qeyri-kənd təsərrüfatı məşğulluq məlumatları açıqlandıqdan sonra neft qiymətlərinin düşməsi daha da sürətlənib. Brent nefti 2,2% ucuzlaşaraq 66,14 dollara geriləyib. 

İş axtarmaq heç vaxt bu qədər həyəcanlı olmayıb! Hər gün yeni vakansiyalar, maaşı yüksək, etibarlı elanlar - AzVak.az-da. İndi bax, fürsəti qaçırma!