Rusiya Prezidenti Vladimir Putin, Çinə etdiyi dörd günlük səfərin ardından Pekində jurnalistlərin suallarını cavablandırıb.

Marja xəbər verir ki, Çinlə Rusiya arasında təbii qaz ticarəti ilə bağlı əldə olunan razılaşmalardan danışan Putin deyib:

“Rusiya qazının boru kəmərləri ilə Çinə ixracı illik 100 milyard kubmetrə çata bilər. Dünyanın ən böyük enerji istehlakçısı olan Çin, bazar formuluna əsaslanan qiymətlə qaz alacaq və bu da onun üçün üstünlük yaradacaq.”

Putin, Zelenski ilə görüşməyi heç vaxt rədd etmədiyini vurğulayıb və ABŞ Prezidenti Donald Trampın da ona belə bir görüşün mümkünlüyünü soruşduğunu bildirib.

O, belə bir görüş üçün yaxşı hazırlıq lazım olduğunu qeyd edərək deyib: “Əgər Zelenski hazırdırsa, Moskvaya gəlsin və bu görüş baş tutsun.”

Putin, sağlam düşüncənin üstün gələcəyi halda Ukrayna məsələsində həll yoluna nail olunacağını vurğulayıb:

“Tramp administrasiyası da həll üçün səmimi səylər göstərir. Məncə tunelin sonunda müəyyən bir işıq göründü. Görək vəziyyət necə inkişaf edir. Əks halda, müəyyən etdiyimiz vəzifələri hərbi yolla həll etməli olacağıq.”

Ukrayna ilə İstanbul danışıqları

Putin, Ukraynanın NATO-ya üzv olmasına qarşı olduqlarını bir daha bildirib və ərazi mübadiləsi qarşılığında Ukraynaya təhlükəsizlik zəmanəti verilməsi ilə bağlı anlaşmanın gündəmdə olmadığını qeyd edib.

O, Ukraynada ərazi məsələsinə dair referendum keçirilməli olduğunu bildirərək deyib: “Ancaq fövqəladə vəziyyət şəraitində referendum keçirilə bilməz. Bu isə referendum üçün fövqəladə vəziyyətin ləğv olunması, onun ardınca da prezident seçkisinin keçirilməsi deməkdir. Bu proses sonsuza qədər uzana bilər.”

Putin, İstanbulda keçirilən birbaşa danışıqlarda Rusiya nümayəndə heyətinə rəhbərlik edən Vladimir Medinskinin işindən məmnun olduğunu deyib və Rusiya tərəfinin Ukrayna ilə danışıqlardakı heyət səviyyəsini yüksəltməyə hazır olduqlarını qeyd edib.

Azərbaycan Prezidenti İlham Əliyevlə Pekində qarşılaşmasına da toxunan Putin deyib: “Əliyevlə salamlaşdım, xanımı ilə salamlaşdım. Bir neçə kəlmə danışdıq. Rusiya ilə Azərbaycan arasında problemlər var, amma münasibətləri inkişaf etdirmək istəyi hər şeyi yerinə oturdacaq.”