Cümə axşamı ABŞ-da ÜDM göstəricilərinin dərc olunması ərəfəsində dollar major valyutalar qarşısında ucuzlaşıb. EUR/USD valyuta cütlüyü 1.15740 səviyyəsindən 1.16540 səviyyəsinə qədər artıb. Eyni müddət ərzində GBP/USD cütlüyü 1.34160 həddindən 1.35180 həddinə kimi yüksəlib. USD/JPY cütlüyü isə 148.180 səviyyəsindən 147.070 səviyyəsinə qədər eniş sərgiləyib. 

Qızılın qiyməti artmaqda davam edir. Dəyərli metal bu gün 3400$-a qədər bahalaşıb. Lakin, bir qədər ucuzlaşaraq “sarı metal” hazırda 3390$-dan ticarət olunur. Beynəlxalq birjalarda “Brent” markalı neftin bir barel üçün qiyməti ötən gün 68$-a kimi bahalaşdıqdan sonra dəyər itirməyə başlayıb və 67.3$-a qədər geriləyib.

Qeyd etmək lazımdır ki, ABŞ-ın Energetika Nazirliyinin dünən verdiyi məlumata əsasən, ölkənin kommersiya məqsədli neft ehtiyatları ötən həftə 2.39 milyon barrel azalıb. 

Çərşənbə günü keçirilən ticarət sessiyasının yekunlarına görə Amerika fond indeksləri yüksəlib, “S&P 500” indeksi 6489 bəndədək artaraq tarixi maksimumunu yeniləyib. Bazar iştirakçılarının diqqət mərkəzində texnologiya sektorunun, xüsusilə süni intellektin inkişafı sahəsində perspektivləri daha yaxşı qiymətləndirmək və texnologiya şirkətlərinin dəyər qiymətləndirmələrinin əsaslı olub-olmadığını təhlil etmək üçün “Nvidia Corp.” şirkətinin rüblük maliyyə hesabatları olub.

Amerikalı qrafik prosessor istehsalçısının səhmləri hesabatın dərc olunmasından sonra 3% ucuzlaşıb. Post-ticarət mərhələsində qiymətli kağızlar 174$-dək geriləyib. İnvestorların diqqəti şirkətin əsas gəlir mənbəyi olan data mərkəzləri bölməsinə yönəlib (şirkətin ümumi gəlirinin təxminən 88%-i bu bölmənin payına düşür). 2025–2026 maliyyə ilinin ikinci rübündə (27 iyulda başa çatıb) bu bölmənin gəliri rüblük müqayisədə 5%, illik müqayisədə isə 1.56 dəfə artaraq 41.096 milyard dollar təşkil edib. Halbuki proqnoz 41.3 milyard dollar idi.

Bu gün ABŞ-da ÜDM-dən əlavə açıqlanacaq İşsizlik Müavinəti üçün Müraciətlərin Sayı göstəricisi investorların marağına səbəb olacaq. Həmçinin, bazar iştirakçıları Avropa Mərkəzi Bankının (AMB) dərc olunacaq pul-kredit siyasəti hesabatını və İsveçrədə açıqlanacaq ÜDM məlumatlarını diqqətlə izləyəcəklər.

Məlumat İnvest-AZ İnvestisiya Şirkətinin analitikləri tərəfindən hazırlanıb.