ABŞ prezidenti Donald Tramp bildirib ki, yaxın vaxtlarda ölkəyə idxal olunan çiplərə əlavə gömrük rüsumları tətbiq etməyi planlaşdırır. Onun sözlərinə görə, bu qərar "gələn həftə və ya təxminən o dövrdə" qüvvəyə minəcək. Buna səbəb kimi, Trampın qısa müddətdə çip istehsalının ABŞ ərazisinə köçürülməsi istəyi qeyd olunur. Bundan əlavə, o, həmin müddət ərzində dərman məhsullarına da əlavə rüsumlar tətbiq edəcəyini elan etməyi planlaşdırır. Bu rüsumların miqdarı 250%-ə qədər ola bilər.

ABŞ Prezidenti həmçinin Hindistana qarşı əlavə gömrük rüsumları tətbiq etməklə təhdid edib, çünki Dehli hələ də Rusiya neftini almağa davam edir. “Ticarət müharibələri” dünya iqtisadiyyatının gələcəyi ilə bağlı qeyri-müəyyənliyi artırır.

Bundan başqa, Tramp yaxın vaxtlarda Federal Ehtiyatlar Sisteminin (FED) idarə heyətində Adriana Kuglerin yerinə təyin ediləcək namizədi açıqlayacağını bildirib. Kugler ötən həftənin sonunda 8 avqustdan etibarən istefa vermək niyyətində olduğunu açıqlamışdı. Tramp həmçinin FED-in yeni rəhbəri vəzifəsinə namizədini də yaxın zamanda açıqlayacağını vəd edib.

Qlobal iqtisadi qeyri-müəyyənlik fonunda dollar təzyiq altında qalmağa davam edir. EUR/USD valyuta cütlüyü ötən gün 1.15280 səviyyəsinə kimi ucuzlaşdıqdan sonra artıb və bu gün 1.15880 səviyyəsinə qədər yüksəlib. Eyni müddət ərzində USDJPY cütlüyü 1.32600 həddindən 1.33150 həddinə qədər bahalaşıb. 

Avqustun 5-də ABŞ-ın Təchizatların İdarə Edilməsi İnstitutunun (ISM) dərc etdiyi məlumatlara əsasən, ölkənin Xidmət Sektorunda Biznes Aktivliyi İndeksi (PMI) iyul ayında 50.8 bənddən 50.1 bəndədək azalıb. Məşğulluq İndeksi isə 47.2 bənddən 46.4 bəndədək geriləyib.

Digər tərəfdən, “S&P Global” tərəfindən hesablanan xidmət sektorunda PMI iyul ayında 52.9 bənddən 55.7 bəndədək yüksəlib. Kompozit PMI isə iyulda əvvəlki ayla müqayisədə 52.9 bənddən 55.1 bəndədək artıb.

Eləcə də, ABŞ-ın iyun ayında xarici ticarət balansının kəsiri əvvəlki ayla müqayisədə 16% azalaraq 60.2 milyard dollar təşkil edib. İyun ayında ixrac 1.3 milyard dollar (0.5%) azalaraq 277.3 milyard dollar təşkil edib. İdxal isə 12.8 milyard dollar (3.7%) azalaraq 337.5 milyard dollara düşüb.

2025-ci ilin iyul ayında Avrozonanın Xidmət Sektorunda Biznes Aktivliyi İndeksi (PMI) 50.5 bənddən 51 bəndə qədər yüksəlib. Açıqlanan göstərici analitiklərin 51.2 bəndlik proqnozunun altında qalsa da, xidmət sektorunda mart ayından bəri ən sürətli artımı əks etdirib. Avrozonanın ən böyük iqtisadiyyatı olan Almaniyanın xidmət sektorunda PMI isə 49.7 bənddən 50.6 bəndədək artıb. 

Bu gün ABŞ-da kommersiya məqsədli neft ethiyatları ilə bağlı dərc olunacaq rəqəmlər “qara qızıl”ın beynəlxalq birjalarda qiymətinə təsir edə bilər. Həmçinin, Almaniyada açıqlanacaq Sənaye Sektorunda Sifarişlərin Həcmi və Böyük Britaniyada dərc olunacaq Tikinti Sektorunda Biznes Aktivliyi İndeksi göstəriciləri investorların marağına səsəb olacaq.

Məlumat İnvest-AZ İnvestisiya Şirkətinin analitikləri tərəfindən hazırlanıb.