Şimali Makedoniya ilə interkonnektorun tikintisi Serbiyaya tədarük mənbələri və istiqamətlərinin şaxələndirilməsini nəzərdə tutur.

Bunu Serbiyanın mədən və energetika naziri Dubravka Cedoviç-Handanoviç  müsahibəsində deyib.

Onun sözlərinə görə, bu, Serbiyaya Trans-Anadolu (TANAP) və Trans-Adriatik (TAP) qaz kəmərlərini birləşdirən Cənub Qaz Dəhlizi sistemi vasitəsilə Azərbaycan qazı almağa imkan verəcək.

“Bu baxımdan biz Azərbaycan qazının davamlı, etibarlı və arta bilən idxalı üçün möhkəm təməl yaradırıq”, - nazir bildirib.

D.C.Handanoviç xatırladıb ki, Kalotina bölgəsində qaz kəmərinin tikintisi artıq başa çatıb və bu, Azərbaycan qazının ölkəyə tədarük edildiyi yeganə marşrutdur.

O dəqiqləşdirib ki, hazırda ölkənin qaza olan tələbatının əsas hissəsi "Balkan axını" hesabına təmin edilir: “Biz xüsusilə bir təchizatçıdan asılılığın azaldılması səyləri baxımından Azərbaycan qazını əsas alternativ mənbə hesab edirik”.

Serbiyalı nazir qeyd edib ki, Azərbaycanla son bir neçə ildə formalaşmağa başlayan tərəfdaşlıq enerji dayanıqlılığının təmin edilməsində mühüm mərhələ və bir neçə onillikdən sonra qaz təchizatının şaxələndirilməsində ilk addım oldu. İmzalanmış sazişlər 2026-cı ilə qədər ildə 400 milyon kubmetrə yaxın qaz tədarükünü nəzərdə tutur. Gələcəkdə bu həcm 2,5 dəfə artırılaraq 1 milyard kubmetrə çatdırıla bilər:

“Ümid edirik ki, yaxın vaxtlarda yeni müqavilələrin imzalanması ilə bağlı danışıqlara start veriləcək. Bu müqavilələr etibarlı tədarüklə yanaşı, tikintisi planlaşdırılan qaz elektrik stansiyalarının fəaliyyəti üçün yetərli resursun təmin olunmasını mümkün edəcək. Bu baxımdan Cənub Qaz Dəhlizi çərçivəsində Azərbaycanla əməkdaşlıq bizim üçün uzunmüddətli və strateji əhəmiyyət kəsb edir.

Xəbər verildiyi kimi, Serbiya və Şimali Makedoniya hökumətləri 2024-cü ilin oktyabrında təxminən 70 km uzunluğunda və ildə 1,2 milyard kubmetrə yaxın təbii qaz ötürmə qabiliyyətinə malik qaz kəmərinin birgə tikintisi haqqında memorandum imzalayıb.

Qeyd edək ki, TANAP ilə təbii qazın kommersiya nəqlinə 2018-ci il iyunun 30-da başlanılıb. 1 805 km uzunluğunda olan TANAP "Şahdəniz-2" yatağından Azərbaycan qazının Gürcüstan-Türkiyə sərhədindən Türkiyənin qərb sərhədlərinə nəql edilməsi üçün nəzərdə tutulub. Hazırda qaz kəmərinin ötürmə qabiliyyəti 16,2 milyard kubmetrdir.

Azərbaycan qazının Xəzərdən Avropaya nəqli üçün nəzərdə tutulmuş Cənub Qaz Dəhlizinin son komponenti olan Transadriatik qaz kəməri 2020-ci il noyabrın 15-də kommersiya istismarına verilib. Ümumi uzunluğu 878 km olan TAP Yunanıstan, Albaniya, Adriatik dənizi və İtaliyadan keçir. Bu günədək TAP vasitəsilə Avropaya 45,6 milyard kubmetr Azərbaycan qazı tədarük edilib.