Bank “BTB” ASC 2025-ci ilin 1-ci yarısı (yanvar-iyun) üzrə maliyyə göstəricilərini açıqlayıb.

Bankın yaydığı press-relizdə bildirilir ki, müsbət dinamika davam etməkdədir. Belə ki, bankın əməliyyat mənfəəti ötən ilin müvafiq dövrü ilə müqayisədə 10.5% artaraq 2.6 milyon manata çatıb. Bankın xalis faiz gəlirləri 2024-cü ilin müvafiq dövrü ilə müqayisədə 11.3% artaraq 6.6 milyon manat, qeyri-faiz gəlirləri 29,7% artaraq 3,3 milyon manat təşkil edib. 

Qeyd edilib ki, Bankın 6 ay üzrə xalis mənfəəti isə 1,1 milyon manatı* ötmüşdür. Hesabat dövrü ərzində gözlənilməz fəaliyyət növlərindən və əvvəlki dövr üçün uçotdakı dəyişiklikləri nəzərə alaraq 2,8 milyon manat xərc yaranmışdır.

2025-ci ilin 2-ci rübü ərzində Bank “BTB” ASC 3 milyon manat məbləğində kapital artımını uğurla həyata keçirmişdir. 7 il tədavül müddətinə malik olan istiqrazların emissiyası subordinasiya borc öhdəliyi kimi tanınmış və bu da Bank “BTB” ASC-nin II dərəcəli kapitalının artırmasına və maliyyə dayanıqlığının daha da güclənməsinə kömək etmişdir.

Qeyd edilib ki, Bank İpoteka kreditləri üzrə mövqeyini qoruyur və aparıcı banklardan biri olaraq 2025-ci ilin 6 ayı ərzində 7 milyon manat məbləğində 68 vətəndaşa Adi və Güzəştli ipoteka krediti rəsmiləşdirilmişdir. MİDA tərəfindən layihə üzrə hər – hansı bir satış olmadığı üçün bank tərəfindən bu məhsul üzrə rəsmiləşdirmə olmamışdır.

30 İyun 2025-ci il tarixində Bank “BTB”nin məcmu kapitalı 52,3 milyon manat təşkil etmişdir, bu da Mərkəzi Bankın minimum tələbindən (50 milyon manat) yüksəkdir. Məcmu kapitalın adekvatlıq göstəricisi 22 % təşkil etməklə, Mərkəzi Bankın minimum tələbini (10%) əhəmiyyətli dərəcədə üstələyir. 

Bankın ani likvidlik əmsalı isə 185% təşkil edir, bu da Mərkəzi Bankın minimum tələbindən 6 dəfə artıqdır (Mərkəzi Bankın minimum tələbi - 30%).

Bank “BTB” ASC Azərbaycan Respublikasının Mərkəzi Bankı tərəfindən verilmiş 19.03.2010-cu il tarixli 254 nömrəli lisenziya əsasında fəaliyyət göstərir. Bank Bakı, Gəncə və Sumqayıt şəhərlərində yerləşən ümumi 8 xidmət nöqtəsilə müştərilərə korporativ və pərakəndə bankçılıq sahəsində məhsul və xidmətlərini təqdim edir.

*Gözlənilməz fəaliyyət növlərindən və əvvəlki dövr üçün uçotdakı dəyişikliklərdən xərc nəzərə alınmadan.