Bu gün ABŞ-da Qeyri-kənd Təsərrüfatı Sektorunda Yeni Yaranan İş Yerlərinin Sayı (NFP) göstəricisinin dərc olunması ərəfəsində dollar major valyutalar qarşısında bir qədər dəyər qazanıb.

Belə ki, EUR/USD valyuta cütlüyü 1.18100 səviyyəsinə qədər bahalaşdıqdan sonra 1.17880 səviyyəsinə qədər geriləyib.

GBP/USD cütlüyü ötən gün ərzində 1.37520 həddindən 1.35620 həddinə kimi kəskin enib. Bu gün isə məzənnə 1.36650 səviyyəsinə qədər artlm sərgiləyib.

Beynəlxalq birjalarda qızılın qiyməti 24 iyun 2025–ci il tarixindən etibarən ilk dəfə 3366$-a qədər bahalaşıb. “Brent” markalı neftin bir barel üçün dəyəri isə 70.00$ həddinə qədər kəskin şəkildə yüksəlib. Hazırda “qara qızıl” 69.40$-a ticarət olunur.

Öncəki gün İran prezidenti Məsud Pezeşkiyan MAQATE ilə əməkdaşlığın dayandırılması haqqında qanun imzalayıb. Sənəd xüsusilə, “nüvə sahəsində milli təhlükəsizlik təmin olunana qədər” MAQATE müfəttişlərinin İrana girişinə qadağa qoyulmasını nəzərdə tutur.

İsrailin xarici işlər naziri Gideon Saar Tehranın qərarını şərh edərkən Almaniya, Fransa və Böyük Britaniyanı İrana qarşı sanksiyaları bərpa etməyə çağırıb.

Çərşənbə günü neft üçün müsbət amillərdən biri də ABŞ ilə Vyetnam arasında ticarət sazişinin bağlanması xəbəri olub. Razılaşmaya əsasən, Vyetnam məhsullarının ABŞ-a idxal rüsumu 20% təşkil edəcək, Amerikanın Vyetnama ixrac etdiyi məhsullara isə tarif sıfır olacaq.

Dünən açıqlanan məlumatlara əsasən, ABŞ-ın özəl sektorunda iş yerlərinin sayı, “Automatic Data Processing” (ADP) şirkətinin hesabatına görə, iyun ayında 33 min azalıb. Analitiklər göstəricinin 99 min artacağını proqnozlaşdırmışdılar.

Həmçinin, Avrozonada İşsizlik Səviyyəsi aprel ayı ilə müqayisədə may ayında 6.2%-dən 6.3%-ə qədər yüksəlib. Blokun böyük ölkələri arasında ən aşağı işsizlik Almaniyada (3.7%), ən yüksək isə İspaniyada (10.8%) qeydə alınıb. Avropa İttifaqında isə işsizlik may ayında 5.9% səviyyəsində qalıb. 2024-cü ilin həmin ayında bu göstərici 6% təşkil etmişdi.

Analitiklər iyun ayında ABŞ-da qeyri-kənd təsərrüfatı sektorunda iş yerlərinin sayının 120 min artacağını proqnozlaşdırırlar. Qeyd etmək lazımdır ki, NFP bu gün Bakı vaxtı ilə saat 16:30-da dərc olunacaq. Əlavə olaraq, Amerikada açıqlanacaq Orta Saatlıq Əmək Haqqı, İşsizlik Səviyyəsi, İşsizlik Müavinəti üçün Müraciətlərin Sayı, İxrac, İdxal və Ticarət Saldosu göstəriciləri investorların diqqət mərkəzində olacaq xəbərlərdir.

Həmçinin, Türkiyədə və İsveçrədə dərc olunacaq İstehlak Qiymətləri İndeksi, Almaniyada, Avrozonada, Böyük Britaniyada və ABŞ-da açıqlanacaq Xidmət Sektorunda Biznes Aktivliyi İndeksi bazar iştirakçıları tərəfindən maraqla izləniləcək.

Məlumat İnvest-AZ İnvestisiya Şirkətinin analitikləri tərəfindən hazırlanıb.