Amerika fond indeksləri “Moody's”-in ABŞ-ın reytinqini aşağı salması xəbəri fonunda sessiya ərzindəki itkiləri bərpa edərək bazar ertəsi ticarət gününü cüzi artımla başa vurdu. Həmçinin, dollar major valyutalar qarşısında bir qədər bahalaşdı. EURUSD valyuta cütlüyü Avrozonada İstehlak Qiymətləri İndeksi göstəricilərinin proqnozlara uyğun dərc olunması fonunda 1.12880 səviyyəsinə qədər bahalaşıb. Lakin, sonradan məzənnə 1.12180 səviyyəsinə qədər eniş sərgiləyib. Eyni dövr ərzində GBPUSD cütlüyü 1.34030 həddindən 1.33440 həddinə kimi geriləyib. 

Avstraliya Ehtiyatlar Bankının (RBA), proqnoz olunduğu kimi, faiz dərəcəsini 4.10%-dən 3.85%-ə qədər endirdi. Bunun fonunda AUDUSD valyuta cütlüyü 0.64440 həddindən 0.64230 həddinə qədər zəifləyib. Qızılın qiyməti isə təzyiq altında qalmaqda davam edir. Dəyərli metal 3205$ səviyyəsinə qədər ucuzlaşıb. 

“Moody's Ratings” agentliyi ABŞ-ın suveren kredit reytinqini artan dövlət borcu və büdcə kəsiri ilə bağlı narahatlıqlar səbəbilə "Aaa" səviyyəsindən "Aa1" səviyyəsinə qədər endirdi. “Moody’s”, "böyük üçlük" reytinq agentlikləri arasında dünyanın ən böyük iqtisadiyyatına ən yüksək reytinq verən sonuncu agentlik idi.

ABŞ-ın maliyyə naziri Skott Bessent agentliyin qərarını "geridə qalmış göstərici" kimi adlandırdı. O bildirib ki, prezident Donald Trampın administrasiyası ABŞ iqtisadiyyatının artımını sürətləndirəcək, bu da, büdcə xərclərinin artımını kompensasiya edəcək.

“Möhtəşəm yeddilik” şirkətləri arasında “Tesla Inc.” və “Apple Inc.” səhmlərinin qiyməti müvafiq olaraq 2.3% və 1.2% ucuzlaşıb. “Microsoft Corp.”-un kapitalizasiyası 1%, “Amazon.com Inc.”-in 0.3%, “Alphabet Inc.”-in isə 0.2% artıb. “Nvidia Corp.”-un səhmləri 0.1%, Meta-nın qiymətli kağızları isə cəmi 0.01% bahalaşıb.

“Dow Jones Industrial Average” indeksi 137.33 bənd (0.32%) artaraq 42792.07 bənd təşkil edib. “S&P 500” indeksi 5.22 bənd (0.09%) artaraq 5963.6 bəndə yüksəlib. “Nasdaq Composite” indeksi isə 4.36 bənd (0.02%) artaraq 19215.46 bənd səviyyəsində qərarlaşıb.

Bugün Almaniyada dərc olunacaq İstehsal Qiymətləri İndeksi göstəriciləri investorların diqqət mərkəzində olacaq əsas xəbərlərdən biridir. Eləcə də, Kanadada açıqlanacaq inflyasiyaya dair göstəricilər bazar iştirakçılarına maraqlı olacaq. Həmçinin, bugün "Böyük Yeddilik" (G7) ölkələrinin maliyyə nazirləri və mərkəzi bank rəhbərlərinin görüşü baş tutacaq.

Məlumat İnvest-AZ İnvestisiya Şirkətinin analitikləri tərəfindən hazırlanıb.