"ABB-nin 2024-cü il üzrə xalis mənfəətindən səhmdarlarına 200 milyon manat dividend ödəyəcəyik".

Marja.az xəbər verir ki, bunu ABB-nin Səhmdarlarımnın Ümumi Yığıncağının qərarının ictimaiyyətə elan edilməsinə həsr olunmuş mətbuat konfransında "Azərbaycan Beynəlxaq Bankı" ASC-nin (ABB) İdarə Heyətinin sədri Abbas İbrahimov bildirib. 

"Bu, son illərin rekord dividend məbləğidir", - Abbas İbrahimov deyib. 

Bankın sədri qeyd edib ki, dividendin 184 milyon manatı ABB-nin səhmdarı olan dövlətə, 16 milyon manatı isə digər səhmdarlara ödəniləcək:

"Beləliklə, ABB-nin son illər ərzində dövlət büdcəsinə vergi, dividend və sosial ödənişlər şəklində ödədiyi vəsaitlərin ümumi məbləği 1,6 milyard manata çatacaq. Bununla ilk dəfə 30 mindən artıq vətəndaşımız ABB-nin gəlirlərindən öz qazanc payını alacaq".

XXX

ABB səhmdarlarına 200 000 000 manat dividend ödəyəcək!

7 may 2025-ci il tarixində ABB Səhmdarlarının Ümumi Yığıncağı keçirilib.

Bankın yaydığı press-relizdə bildirilir ki, Yığıncaqda ABB-nin 2024-cü il üzrə kənar auditor tərəfindən təqdim olunmuş maliyyə hesabatı təsdiqlənib, bir sıra təşkilati məsələlərə baxılıb, eyni zamanda 2024-cü ilin maliyyə nəticələrinə əsasən, ABB-nin səhmdarlarına dividendin ödənilməsinə qərar verilib. 

Bankın İdarə Heyətinin sədri Abbas İbrahimov keçirdiyi mətbuat konfransında bununla bağlı qərarı elan edərək bildirib ki, ötən ilin mənfəətindən səhmdarlara 200 000 000 manat məbləğində dividend ödəniləcək. 

Onun sözlərinə görə, bu, son 7 ildə səhmdarlarına ardıcıl şəkildə yüksək dividendlər ödəyən ABB-nin ayırdığı rekord dividend məbləğidir. Beləliklə, ABB-nin hər bir səhminin illik gəlirlilik səviyyəsi nominal qiymətlə 15,6%-ə yüksəlib. 

Hazırda ABB-nin 30 mindən çox səhmdarı var. Bankın nizamnamə kapitalının strukturunda dövlətin iştirak payı 92.18%-dir. Bu bölgüyə uyğun olaraq dividendin 184 000 000 manatı dövlət büdcəsinə, 16 000 000 manatı isə digər səhmdarlara ödəniləcək. 

“Qürur duyuruq ki, 30 mindən çox vətəndaşımızla gəlirlərimizi bölüşəcəyik. Həmçinin bu ilin dividend ödənişini də nəzərə alsaq, son illər ərzində ABB-nin dövlət büdcəsinə və digər sosial yönümlü layihələrə ödədiyi vəsaitlərin ümumi məbləği 1,6 milyard manata çatacaq” – Abbas İbrahimov bildirib.

İdarə Heyətinin sədri jurnalistlərə ABB-nin 2024-cü il, eləcə də cari ilin yanvar-aprel ayları üzrə fəaliyyəti, həyata keçirdiyi strateji inkişaf layihələri haqqında ətraflı məlumat verib. 

Mətbuat konfransında ABB-nin 2024-cü il üzrə Dayanıqlı İnkişaf Hesabatı da təqdim olunub. Media nümayəndələrini maraqlandıran çoxsaylı suallar cavablandırılıb.