Tekstil sənayesini əhatə edən dəstək tədbirlərinin artırılması nəzərdən keçirilir

Tekstil sənayesini əhatə edən dəstək tədbirlərinin artırılması nəzərdən keçirilir

Tekstil sənayesini əhatə edən dəstək tədbirlərinin artırılması nəzərdən keçirilir

Azərbaycan Tekstil İstehsalçıları və İxracatçıları Assosiasiyası ilə tekstil sənayesinin gələcək inkişaf perspektivləri müzakirə olunub.

İqtisadiyyat Nazirliyinin dəstəyi, İxracın və İnvestisiyaların Təşviqi Agentliyinin – AZPROMO-nun təşkilatçılığı ilə Azərbaycan İxracatçılar Klubuna daxil olan Azərbaycan Tekstil İstehsalçıları və İxracatçıları Assosiasiyasının nümayəndələri, quruma üzv olan sahibkarlıq subyektləri ilə görüş keçirilib.

Tədbirdə çıxış edən iqtisadiyyat nazirinin müavini Səməd Bəşirli ölkəmizdə sənayenin inkişafı, o cümlədən daha dayanıqlı və çevik sənaye istehsalı modellərinin tətbiqi istiqamətində reallaşdırılan tədbirləri diqqətə çatdırıb. Bildirilib ki, rəqabətə davamlı və ixracyönümlü tekstil məhsullarının istehsalı, xüsusilə, bu sahədə yüksək əlavə dəyərli məhsul istehsalının genişləndirilməsi əsas hədəflərdəndir. Bu, həm yerli istehsal potensialının artırılması, həm də ixrac imkanlarının genişləndirilməsi baxımından önəmlidir.

AZPROMO-nun icraçı direktoru Yusif Abdullayev ölkəmizdə xarici tərəfdaşların iştirakı ilə yeni tekstil müəssisələrinin tikildiyini, eləcə də pambıq klasterlərinin inkişafı üzrə işlərin davam etdirildiyini vurğulayıb. Bildirilib ki, növbəti dövrlərdə tekstil sənayesini əhatə edən dəstək tədbirlərinin artırılması və vahid ölkə stendi ilə yeni sahəvi sərgilərdə iştirakın təmin olunması nəzərdən keçirilir.

Azərbaycan Tekstil İstehsalçıları və İxracatçıları Assosiasiyasının icraçı direktoru Fəridə Axundova və Assosiasiyanın üzvləri qurumun fəaliyyəti, sahibkarların ixracla bağlı təklifləri və tekstil sənayesinin gələcək inkişaf perspektivləri barədə çıxış ediblər.

Tədbirdə tekstil sahəsinin inkişafı ilə bağlı sahibkarların sualları cavablandırılıb.