Qlobal bazarlarsa Dolların zəifləməsinin yeni dalğası, ABŞ prezidenti Donald Trampın Federal Ehtiyat Sistemini (FED, ABŞ Mərkəzi Bankı) tənqid etməsi və davam edən ticarət müharibəsi narahatlıqları təhlükəsiz "liman" tələbini dəstəklədiyi üçün qızılın qiyməti çərşənbə axşamı yeni rekord həddə çatıb.

Marja xəbər verir ki, qızılın unsiyasının qiyməti 3500 dollara çataraq rekord qırıb. Bu bahalaşma dolların dəyərinin 2023-cü ilin sonundan bəri ən aşağı səviyyəyə düşməsilə ilə baş verib. Dünən 3 %-dən çox bahalaşan qızıl, bu gün də 2 faizə yaxın dəyər qazanıb.

Tramp FED sədri Jerome Powell-i (Cerom Pauel) işdən çıxarmağı düşündüyünü söyləyib və faiz dərəcələrinin aşağı salınması lazım olduğunu bildirib. FED-in Çikaqo idarəsinin rəhbəri Austan Goolsbee, pul siyasəti üzrə müstəqilliyi məhdudlaşdırmaq cəhdlərinə dair xəbərdarlıq edib.

"Oversea-Chinese Banking"in baş strateqi Kristofer Vonq deyib: “FED sədri Pauelin vəzifəsindən kənarlaşdırılması təkcə mərkəzi bankın müstəqilliyi prinsipini pozmur, həm də ABŞ-ın pul siyasətini bazarları poza biləcək şəkildə siyasiləşdirmək riski daşıyır”.

Vonq bildirib ki, Fed-in etibarlılığı şübhə altına alınarsa, bu, dollara olan inamı daha da azalda və qızıl kimi təhlükəsiz "sığınacaqlara" keçidi sürətləndirə bilər.

Bu il ərzində qızılın qiyməti dəfələrlə rekord həddə çatıb; Ticarət müharibəsi bazarları əsəbiləşdirdiyindən, qızıl bu il bir-birinin ardınca rekordlar qırıb. Ticarət müharibəsinin bazarlardakı narahatlığı riskli aktivlərə marağı azaldıb və investorları qızıl kimi təhlükəsiz "sığınacaqlara" (az riskli) yönəldib. Qızılla dəstəklənən birja fondlarında (ETF) aktivlər 12-ci həftədir ki, artmaqdadır. Eyni zamanda, mərkəzi banklar da qlobal tələbi dəstəkləyərək ehtiyatlarına qızıl əlavə edirlər.

Çin bir daha Pekinin maraqları bahasına edilən istənilən razılaşmaya qarşı olduğunu vurğulayıb.

BVF-nin bu həftə təqdim edəcəyi yenilənmiş iqtisadi proqnozları kimi məlumatlar qlobal yavaşlama ilə bağlı narahatlıqları gücləndirə bilər.

Qlobal banklar qızılın gələcəyi ilə bağlı daha optimistdirlər. "Goldman Sachs" qızılın qiymətinin 2026-cı ilin ortalarında 4000 dollara çata biləcəyini proqnozlaşdırır.