2024-cü ilin sonu ilə müqayisədə 2025-ci ilin 1-ci rübü ərzində "Bank of Baku"nun cəmi aktivləri 70 milyon 786 min manat və ya 7,6% artaraq 31 mart 2025-ci il tarixində 1 milyard 5 milyon 59 min manata çatıb. Bank 2024-cü ilin sonunda 934 milyon 273 min manat cəmi aktivlərə malik idi. 

Marja.az xəbər verir ki, o cümlədən, "Bank of Baku"nun kredit portfeli (müştərilərə verilmiş kreditlər) 16 milyon 619 min manat və ya 2,2% artaraq 777 milyon 43 min manata yüksəlib. Bankın qiymətli kağızlara investisiyaları 31 milyon 942 min manat və ya 72% artaraq 76 milyon 362 min manata qalxıb. 

İlk rübdə "Bank of Baku"nun cəmi depozit portfeli 25 milyon 952 min manat və ya 4,4% artaraq 31 mart 2025-ci il tarixində 618 milyon 467 min manat təşkil edib.

XALİS MƏNFƏƏTİ 2 DƏFƏ ARTIB

"Bank of Baku" ASC 2025-ci ilin 1-ci rübünü (yanvar - mart) 7 milyon 143 min manat xalis mənfəət ilə başa vurub. Bank 2024-cü ilin 1-ci rübünü 3 milyon 504 min manat xalis mənfəət ilə bağlamışdı. Beləliklə, "Bank of Baku"nun xalis mənfəəti 2025-ci ilin 1-ci rübündə ötən ilin eyni dövrü ilə müqayisədə 3 milyon 639 min manat və ya 2 dəfə artıb. 

GƏLİRLƏRİ ARTIB

2025-ci ilin ilk rübündə ötən ilin ilk rübü ilə müqayisədə "Bank of Baku"nun cəmi əməliyyat gəlirləri (faiz və qeyri-faiz gəlirləri) 5 milyon 787 min manat və ya 14,8% artaraq 44 milyon 838 min manat, cəmi əməliyyat xərcləri isə 2 milyon 810 min manat və ya 8,6% artaraq 35 milyon 313 min manat təşkil edib. "Bank of Baku"nun əməliyyat gəlirlərindəki artımın məbləği əməliyyat xərclərindəki artımın məbləğindən 2 milyon 977 min manat çox olduğu üçün əməliyyat mənfəəti də bir o qədər artıb. 

2024-cü ilin 1-ci rübünün yekununda "Bank of Baku"nun əməliyyat mənfəəti 6 milyon 550 min manat ikən, 2025-ci ilin 1-ci rübündə 9 milyon 525 min manat təşkil edib. Həmçinin, mümkün zərərlər üçün yaradılan məqsədli ehtiyatlardan azad olan 339 min manat mənfəətə əlavə olunub (ötən ilin eyni dövründə Bank əməliyyat mənfəətindən 1 milyon 760 min manat ehtiyata ayırmışdı). Beləliklə, həm gəlirlərin artması, həm də ehtiyatdan qayıdan məbləğ "Bank of Baku"nun xalis mənfəətinin 2 dəfə artmasını təmin edib.