Azərbaycanın aparıcı korporativ maliyyə institutu "PAŞA Bank" ölkə iqtisadiyyatının şaxələndirilməsi və qeyri-neft sektorunun inkişafını dəstəkləyən təşəbbüslərini davam etdirir.

Marja.az Bankın yaydığı məlumata istinadən xəbər verir ki, bu istiqamətdə atılan növbəti addım olaraq, Bank Azərbaycan Biznesinin İnkişafı Fondunun güzəştli kredit mexanizmi çərçivəsində İsmayıllı rayonunun Topçu kəndində "Azerbaijan Coca-Cola Bottlers" MMC-nin sərinləşdirici içkilər istehsal edəcək yeni zavodunun tikintisi üçün 10 milyon manat məbləğində kredit ayırıb.

Yeni zavod ildə 165 milyon litr sərinləşdirici içki istehsal  etmək gücünə sahib olacaqdır. Zavodun işə salınması bu regionda 100-ə yaxın daimi iş yerinin yaradılmasına imkan verəcək.

"PAŞA Bank" İdarə Heyətinin sədri Cavid Quliyevin sözlərinə görə, Azərbaycan iqtisadiyyatının real sektorunun etibarlı maliyyə tərəfdaşı kimi, Bank ölkənin qeyri-neft sektorunun gücləndirilməsinə və real sektorun inkişafına öz töhfəsini verməyə davam edəcək.

"Azərbaycan Respublikasının sosial-iqtisadi inkişafının prioritet istiqamətlərinə uyğun olaraq, “PAŞA Bank” istehsal, kənd təsərrüfatı, nəqliyyat və logistika, İKT və digər qeyri-neft sektorlarının əsas istiqamətləri üzrə həyata keçirilən layihələrdə daima iştirak edir. Ölkəyə beynəlxalq təcrübənin və müasir texnologiyaların gətirilməsi, yeni iş yerlərinin açılması, eləcə də real sektorda sahibkarın inkişafına təkan verən investisiya layihələrinin icrası “PAŞA Bank”ın əsas prioritetlərindən biridir.  Əminəm ki, bu layihə Azərbaycanın qeyri-neft sektorunun şaxələndirilməsinə mühüm töhfə verəcək", - deyə, Quliyev bildirib.

“Azerbaijan Coca-Cola Bottlers" MMC-nin baş direktoru Rəna Məmmədova qeyd edib ki, 30 illik fəaliyyətini qeyd etdiyi zamanda bu sərmayə şirkətin inkişaf yolunda əlamətdar bir mərhələni ifadə edir.

“Yeni istehsal müəssisəmiz ölkəyə uzunmüddətli öhdəliyimizin, xarici biznes üçün münbit şəraitin olmasının və onun gələcəyinə olan inamımızın bariz göstəricisidir. Biz sadəcə bir şirkət deyil, həm də etibarlı tərəfdaşıq – müştəri və istehlakçılarımız üçün dəyər yaratmağa, əməkdaşlarımızı gücləndirməyə və xidmət etdiyimiz icmalara töhfə verməyə sadiqik. Bank tərəfdaşlarımızın güclü dəstəyi ilə bu mühüm addımı atmaqdan qürur duyuruq,” - deyə, Məmmədova bildirib.

Qeyd edək ki, “PAŞA Bank” bu il “International Investor” beynəlxalq nəşri tərəfindən “Azərbaycanın ən yaxşı bankı” elan edilib. Bank bu mükafata Azərbaycanın qeyri-neft sektorunda qazandığı uğurlara, ölkə iqtisadiyyatının, o cümlədən real sektorun və biznesin dayanıqlı inkişafına verdiyi töhfələrə görə layiq görülüb.