“Expressbank” ASC 2025-ci ilin 1-ci rübünü (yanvar - mart) 2 milyon 420 min manat xalis mənfəət ilə başa vurub. Bank 2024-cü ilin 1-ci rübünü 3 milyon 396 min manat xalis mənfəət ilə bağlamışdı. Beləliklə, "Expressbank"ın xalis mənfəəti 2025-ci ilin 1-ci rübündə ötən ilin eyni dövrü ilə müqayisədə 976 min manat və ya 28,7% azalıb.

Bankın xalis mənfəətinin azalması mümkün zərərlər üzrə yaradılan ehtiyatlara ayırmanın artması ilə əlaqədardır. İlk rübdə "Expressbank"ın xərcləri, o cümlədən depozitlər üzrə faiz xərcləri, əməkhaqqı xərcləri artıb. 

2025-ci ilin 1-ci rübündə 2024-cü ilin 1-ci rübü ilə müqayisədə "Expressbank"ın cəmi əməliyyat gəlirləri (faiz və qeyri-faiz gəlirləri) 3 milyon 565 min manat və ya 17,7% artaraq 23 milyon 736 min manat, cəmi əməliyyat xərcləri (faiz və qeyri-faiz xərcləri) isə 3 milyon 560 min manat və ya 23,5% artaraq 18 milyon 690 min manat təşkil edib.

ƏMƏLİYYAT MƏNFƏƏTİ SABİT QALIB

"Expressbank"ın gəlirlərdəki artım xərclərindəki artımdan cəmi 5 min manat artıq olduğu üçün bankın əməliyyat mənfəəti də bir o qədər artaraq 5 milyon 45 min manat təşkil edib (2024-cü ilin 1-ci rübüdə əməliyyat mənfəəti 5 milyon 40 min manat təşkil etmişdi). Bank ilk rübdə əməliyyat mənfəətindən 2 milyon 8 min manat mümkün zərərlər üçün yaradılan məqsədli ehtiyatlara ayırıb (2024-cü ilin 1-ci rünbündə 612 min manat ayrımışdı). Ehtiyata ayırmanın artması "Expressbank"ın xalis mənfəətinin düşməsinə səbəb olub.

KREDİT PORTFELİ YARIM MİLYARD MANATA YAXINDIR

31 mart 2025-ci il tarixində "Expressbank" 607 milyon 55 min manat cəmi aktivlərə, o cümlədən 499 milyon 534 min manat kredit portfelinə malik olub. İlk rübdə bankın biznes kreditləri portfeli 3 milyon 780 min manat artaraq 169 milyon 142 min manata, ipoteka kreditləri portfeli isə 3 milyon 72 min manat artaraq 116 milyon 684 min manata yüksəlib. Bankın istehlak kreditləri portfeli isə 9 milyon 278 min manat azalaraq 213 milyon 708 min manata düşüb.

"Expressbank"da fiziki şəxslərin depozitləri 16 milyon 350 min manat artaraq 31 mart 2025-ci il tarixində 218 milyon 669 min manat təşkil edib.

31 mart 2025-ci il tarixində "Expressbank" 137 milyon 326 min manat məcmu kapitala malik olub.