"Bank Avrasiya" ASC kiçilib. 

Marja.az xəbər verir ki, 2024-cü ilin sonunda "Bank Avrasiya"nın cəmi aktivləri 200 milyon 978 min manata çatsa da, 2025-ci ilin 1-ci rübündə (yanvar-mart) 4 milyon 577 min manat və ya 2,3% azalaraq 31 mart 2025-ci il tarixində 196 milyon 400 min manat təşkil edib. 

Bankın kiçilməsi müştərilərə verilmiş kreditlərin (kredit portfeli), banklar və digər maliyyə institutlarındakı depozitlərin azalması ilə əlaqədardır. İlk rübdə "Bank Avrasiya"nın cəmi kredit portfeli 4 milyon 537 min manat və ya 3,3% azalaraq 131 milyon 627 min manata, banklar və digər maliyyə institutlarındakı depozitləri isə 7 milyon 176 min manat və ya 20,3% azalaraq 28 milyon 214 min manata düşüb. 

Qeyd edək ki, "Bank Avrasiya"nın kredit portfeli 2024-cü ildə də azalıb. Belə ki, 2023-cü ilin sonunda Bankın cəmi kredit portfeli 137 milyon 169 min manat ikən, 2024-cü ilin sonunda 136 milyon 164 min manat olub (1 milyon 5 min manat azalıb). O cümlədən, 2024-cü il ərzində bankın biznes kreditləri portfeli 66 milyon 214 min manatdan 62 milyon 480 min manata geriləyib. 

2025-ci ilin ilk rübündə "Bank Avrasiya"nın biznes kreditləri portfeli 3 milyon 283 min manat azalaraq 59 milyon 196 min manata, ipoteka kreditləri portfeli isə 1 milyon 847 min manat azalaraq 57 milyon 330 min manata düşüb. İstehlak kreditləri portfeli isə 593 min manat artaraq 15 milyon 100 min manata yüksəlib. 

"Bank Avrasiya"da depozitlər də azalıb. Belə ki, 2025-ci ilin ilk rübündə Bankın cəmi depozit portfeli 5 milyon 635 min manat və ya 8,9% azalaraq 57 milyon 380 min manata geriləyib.  "Bank Avrasiya"da həm fiziki şəxslərin, həm də hüquqi şəxslərin depozitləri azalıb.

Qeyd edək ki,  "Bank Avrasiya" ASC-nin səhmdarları "TOP PROPERTIES" MMC (nizamnamə kapitalında payı  49.5%), “AZBIZNESKOM” MMC (nizamnamə kapitalında payı 49.5%) və Eynullayev Rüstəm Tarıverdi oğludur (nizamnamə kapitalında payı – 1%).