Almaniya Avtomobil Assosiasiyasının (VDA) prezidenti Hildegard Müller açıqlamasında, ABŞ prezidenti Donald Trampın ABŞ-da istehsal olunmayan avtomobillərə tətbiq etdiyi 25 faiz idxal vergisini dəyərləndirib.

Marja.az xəbər verir ki, Müller, aprelin əvvəlində qüvvəyə minməsi planlaşdırılan tarifin (idxal vergisinin) həm şirkətlər, həm də avtomobil sənayesinin bir-birinə bağlı qlobal tədarük zəncirləri üçün əhəmiyyətli bir yük yaratdığını və eyni zamanda, Şimali Amerika da daxil olmaqla istehlakçılar üçün mənfi nəticələrə səbəb olacağını söyləyib. 

"Bu (ABŞ-nin yeni 25 faizlik gömrük rüsumu - red), son nəticədə hər iki tərəfin inkişafına və rifahına mənfi təsir göstərəcək", - Müller deyib.

Müller əlavə rüsumların Avropa İttifaqından (AB) ABŞ-a ixraca əhəmiyyətli dərəcədə mənfi təsir göstərəcəyini qeyd edərək, bunun ABŞ iqtisadiyyatına da birbaşa təsir edəcəyini iddia edib.

Müller Transatlantik Tərəfdaşlıq və azad və ədalətli ticarətin hər iki tərəf üçün böyük iqtisadi əhəmiyyət daşıdığını qeyd edərək, "Transatlantik Tərəfdaşlıq hər iki tərəf üçün böyümə, rifah və məşğulluğun təminatıdır" deyib. 

Müller, "Alman avtomobil sənayesi ABŞ və AB arasında ikitərəfli razılaşmaya dair dərhal danışıqlara çağırır" deyib.

Şirkətlərin 86 faizi mənfi təsir görəcək

VDA-nın məlumatına görə, Almaniyanın avtomobil şirkətlərinin 86 faizi ABŞ-ın bir çox ölkə və bölgələrə tətbiq etdiyi tariflərin onlara da təsir edəcəyini düşünür.

Almaniyanın avtomobil sənayesinin ən çox ixrac etdiyi ölkə ABŞ-dır. VDA məlumatlarına görə, 2023-cü ildə Almaniyadan ABŞ-a təxminən 400 min avtomobil ixrac edilib.

Trampın yeni tarifləri aprelin 2-dən qüvvəyə minəcək

Prezident Donald Tramp idxal edilən avtomobillərə, yüngül kommersiya avtomobillərinə və ehtiyat hissələrinə 25 faiz rüsum nəzərdə tutan  sərəncam imzalayıb. Ağ Evdə imzalanma mərasimində çıxış edən Tramp bunu “Amerikanın qurtuluş gününün başlanğıcı” kimi qiymətləndirib. 

Tramp sözügedən tariflərin aprelin 2-də qüvvəyə minəcəyini, ABŞ-da istehsal edilən avtomobillərə heç bir tarif tətbiq edilməyəcəyini bildirib.

Ağ Evin rəsmisi Will Scharf, Trampın imzalaması üçün sərəncamı təqdim edərkən, bunun avtomobil tarifləri vasitəsilə ABŞ üçün illik 100 milyard dollardan çox gəlir təmin edəcəyinin gözlənildiyini bildirib. 

Ağ Evin paylaşdığı məlumata görə, amerikalılar 2025-ci ildə təxminən 16 milyon avtomobil alacaq ki, bunun da 50 faizi xaricdən gətirilən avtomobillər olacaq.

ABŞ-ın Bernstein araşdırma firmasının məlumatına görə, ABŞ-da satılan bütün avtomobillərin təxminən yarısı və bu ölkədə yığılan avtomobillərin komponentlərin təxminən 60 faizi idxal olunur.