2024-cü il ərzində Azərbaycan ixrac və investisiya imkanlarının təşviqi, yerli şirkətlərin biznes əlaqələrinin daha da genişləndirilməsi, ölkə iqtisadiyyatına investisiya qoyuluşunun təbliğ edilməsi məqsədilə ümumilikdə 59 tədbir (39-u Azərbaycanda, 20-si xaricdə) təşkil edib, habelə 28 beynəlxalq tədbirdə iştirak edib.

Bu barədə Nazirlər Kabinetinin 2024-cü ildə fəaliyyəti haqqında hesabatda bildirilir.

Sənədə əsasən, təşkil olunmuş və iştirak edilmiş tədbirlər çərçivəsində Azərbaycanın investisiya imkanları barədə potensial investorların məlumatlandırılması, qeyri-neft ixracının stimullaşdırılması, ixrac potensiallı yerli məhsullar barədə xarici tərəfdaşlarla əlaqələr qurulması istiqamətində təqdimatlar edilib, ikitərəfli və çoxtərəfli əsasda görüşlər keçirilib. Ümumilikdə hesabat ilində beynəlxalq tərəfdaşlarla əməkdaşlığın genişləndirilməsi məqsədilə İxracın və İnvestisiyaların Təşviqi Agentliyi (AZPROMO) müvafiq tədbirlər çərçivəsində 13 anlaşma memorandumu imzalayıb.

Bundan başqa, "Made in Azerbaijan" brendinin təşviqi mexanizmləri üzrə beynəlxalq sərgi və yarmarkalarda təşkil edilən 10 vahid ölkə stendində iştirakdan 136 müraciət əsasında 68 şirkət yararlanıb, 32 sərgidə fərdi qaydada iştirak baş tutub (mexanizmdən istifadə edən şirkətlərin sayı 22), 7 bazar araşdırması aparılıb, 9 şirkətin yararlandığı 1 alıcı missiyası həyata keçirilib. Ümumilikdə 88 şirkət "Made in Azerbaijan" təşviq mexanizmlərindən 164 dəfə istifadə edib.

"Made in Azerbaijan" təşviq mexanizmi vasitəsilə vahid ölkə stendi ilə ən çox "Gulfood" və "Prodexpo" sərgilərində iştirak baş tutub. 2019-2024-cü illərdə sərgilərdə iştirak nəticəsində çəkilən xərclərlə müqayisədə 6,2 dəfə çox ixrac dəyəri qeydə alınıb. Sərgilərə cəmi 3,6 milyon ABŞ dolları məbləğində vəsait xərclənilib, 22,3 milyon ABŞ dolları dəyərində məhsul ixrac olunub. 2024-cü ildə isə sərgilərə 634 min ABŞ dolları məbləğində vəsait xərclənilib, 7,2 milyon ABŞ dolları dəyərində məhsul ixrac olunub.