Bazar ertəsi günü Avrozonada İstehlak Qiymətləri İndeksinin və Biznes Aktivliyi İndeksinin proqnozların üzərində açıqlanması fonunda avro və funt sterlinq dollar qarşısında kəskin şəkildə bahalaşdı. Belə ki, EUR/USD valyuta cütlüyü gün ərzində 1.03900 səviyyəsindən 1.05000 səviyyəsinə qədər bahalaşdı. GBP/USD cütlüyü isə eyni dövr ərzində 1.25820 həddindən 1.27230 həddinə qədər yüksəldi. 

Dolların ucuzlaşması qızılın dəyərinin artmasına səbəb oldu. Dəyərli metal ötən həftənin sonunda 2833$-a qədər ucuzlaşsa da, cari həftəyə artımla başladı və artıq beynəlxalq birjalarda 2891$-a təklif olunur.

Neftin qiyməti isə eniş tendensiyasını davam etdirir. “Brent” markalı neftin bir barrel üçün qiyməti dünəndən bu yana 74.00$-dan 71.30$-a qədər enib. Kapitallaşmasına görə dünyanın ən böyük kriptovalyutası “Bitcoin” ötən hətəni 84200$ səviyyəsində tamamlasa da, cari həftəni 94200$ həddində açıb. Lakin, tokenin qiyməti ucuzlaşmağa davam edib və hazırda yenidən 84200$ səviyyəsində ticarət olunur.

“Eurostat”-ın ötən gün təqdim etdiyi ilkin məlumatlara əsasən, fevral ayında Avrozonada istehlak qiymətləri illik müqayisədə 2.4% artıb. Analitiklər orta hesabla inflyasiyanın 2.3%-ə qədər zəifləyəcəyini proqnozlaşdırmışdılar. Aylıq ifadədə yanvar ayında istehlak qiymətləri 0.3 ucuzlaşdıqdan sonra, fevral ayında 0.5% bahalaşıb. Həmçinin, Avrozonanın Sənaye Sektorunda Biznes Aktivliyi İndeksi (PMI) yanvar ayı ilə müqayisədə fevral ayında 46.6 bənd səviyyəsindən 47.6 bənd səviyyəsinə qədər qalxaraq son 24 ayın ən yüksək göstəricisini sərgilədi. 

Türkiyədə fevral ayında istehlak qiymətləri illik müqayisədə 39.05% artıb. İnflyasiya ardıcıl doqquzuncu ayda yavaşlayıb və 2023-cü ilin iyun ayından bəri ən kiçik artım tempini göstərib. Aylıq ifadədə inflyasiya yanvarda 5.03%-dən 2.27%-ə qədər zəifləyib. Eləcə də, ABŞ-da “S&P Global” tərəfindən dərc olunan məlumatlara əsasən, ölkənin Sənaye Sektorunda Biznes Aktivliyi İndeksi (PMI) 51.2 bənddən 52.7 bəndədək yüksəlib. Lakin, ISM tərəfindən təqdim olunan məlumatlarda sənaye sektorunda PMI-ın 50.9 bənddən 50.3 bəndədək zəiflədiyi qeyd olunub. 

Bugün Bakı vaxtı ilə saat 14:00-da Avrozonada dərc olunacaq İşsizlik Səviyyəsi investorların diqqət mərkəzində olacaq əsas xəbərdir. Həmçinin, Yaponiya Bankının (BoJ) sədri Uedanın çıxışı bazar iştirakçılarına USDJPY cütlüyündə gələcək istiqaməti seçmək üçün ipuçları verə bilər.

Məlumat İnvest-AZ İnvestisiya Şirkətinin analitikləri tərəfindən hazırlanıb.