Dünən ABŞ-da “Conference Board” analitik şirkəti tərəfindən dərc olunan İstehlakçıların İnam İndeksinin proqnozların altında açıqlanması fonunda dollar major valyutalar qarşısında ilk öncə bahalaşdı, sonra isə ucuzlaşaraq əldə etdiyi mövqelərini qismən itirdi.

Belə ki, EUR/USD valyuta cütlüyü çərşənbə günü artım tendensiyasını davam etdirərək 1.05250 həddinə qədər yüksəldi. Lakin, bugün məzənnə 1.04960 səviyyəsinə qədər geriləyib. Ötən gün qızılın qiyməti kəskin şəkildə ucuzlaşdı. Sarı metalın dəyəri 2888$-a qədər gerilədi, lakin, sonradan bahalaşaraq 2918$-a qədər yüksəldi. 

ABŞ prezidenti Donald Trampın Rusiya-Ukrayna münaqişəsinin nizamlanması perspektivləri ilə bağlı yeni bəyanatları, eləcə də, İrana qarşı yeni sanksiyaların tətbiqinin mümkün nəticələri fonunda beynəlxalq birjalarda neft qiymətlərinin eniş tendensiyası sürətlənb. “Brent” markalı neftin bir barrel üçün qiyməti ötən gün ərzində 75.15$ səviyyəsindən 72.60$ səviyyəsinə qədər ucuzlaşıb. “WTI” markalı neftin qiyməti isə 71.20$ həddindən 68.70$ həddinə kimi geriləyib.

Almaniyanın Federal Statistika Agentliyi (Destatis) tərəfindən çərşənbə günü açıqlanan yenilənmiş məlumatlarda qeyd olunub ki, ölkənin Ümumi Daxili Məhsulu (ÜDM) 2024-cü ilin dördüncü rübündə əvvəlki üç ay ilə müqayisədə 0.2% azalıb. İllik müqayisədə də Almaniyanın ÜDM-i oktyabr-dekabr aylarında 0.2% azalıb. Həmçinin, “Conference Board” tədqiqat təşkilatının hesabatına əsasən, yanvar ayında ABŞ-da İstehlakçı İnamı indeksi 105.3 bənddən 98.3 bəndədək geriləyib. Analitiklər göstəricinin 102.7 sadəcə bəndədək enəcəyini ehtimal edirdilər. Əlavə olaraq, Yaponiyada İstehlak Qiymətlərinin Baza İndeksi illik ifadədə 1.9%-dən 2.2%-ə qədər yüksəlib.

Bugün Bakı vaxtı ilə saat 19:00-da ABŞ-da dərc olunacaq Yeni Mənzil Satışlarının Həcmi və Kommersiya Məqsədli Neft Ehtiyatlarının Həcmi göstəriciləri investorların marağına səbəb olacaq əsas xəbərlərdir. Həmçinin, Almaniyada açıqlanacaq “Gfk” İstehlakçı İnam İndeksi və ABŞ-da dərc olunacaq Tikinti üzrə İcazələrin Sayı bazar iştirakçıları tərəfindən izləniləcək göstəricilərdir.

Məlumat İnvest-AZ İnvestisiya Şirkətinin analitikləri tərəfindən hazırlanıb.